Россия Федерациязының Культура яамызы «Өг-бүле» национал төлевилелдиң сорулгаларын боттандырары-биле культура албан черлериниң эде чаартылгазынга 2027 чылда субсидия бээринге РФ-тиң субъектилер аразында тиилекчилерни чарлаан. Көдээ Культура бажыңнарының болгаш библиотекаларның ажылында тергиин практикаларга бүгү-российжи мөөрейниң тиилекчилер санынче Тыва Республикада үш культура албан черлери кирген.
Бүгү-российжи мөөрейлер библиотекаларның болгаш культура бажыңнарының чедиишкиннерин демдеглеп, чогаадыкчы шиитпирлерни болгаш үре-түңнелдиг аргаларны ажылынга ажыглааны дээш шаңнаар сорулгалыг. Ол ышкаш бир кол сорулга – мурнакчы арга-дуржулганы илередип, оларны калбаа-биле ажыглаарынга бүгү чурттуң культура албан черлеринче тарадыр.
Республиканың Улусчу чогаадылга төвүнүң, Бии-Хем кожууннуң Өөк суурда көдээ культура бажыңының, Бай-Тайга кожууннуң Кызыл-Даг суурда культура болгаш дыштанылга төвүнүң ажыл-чорудулгазының онзагай арга-дуржулгазын сайгарып көргеш, федералдыг деткимчени бээр кылдыр шилээн.
«Бүгү-российжи мөөрейге тиилелге – республиканың культура албан черлериниң коллективтериниң күш-ажылынга үнелел болгаш оларның инфраструктуразын чаартырынче чугула базым-дыр. Субсидиялар Тываның чурттакчыларынга чогаадыкчы болгаш дыштанылга аргаларын калбартырынга материал-техниктиг баазазын чаартыр» - деп, Тываның Культура яамызы демдеглээн.
Чылдың-на федералдыг деңнелге Тываның көдээ культура бажыңнарының база библиотекаларының чедимчелиг арга-дуржулгазын демдеглеп турар. Эрткен чылдың шилилгезиниң түңнелинде, Тывадан Бай-Тайга кожууннуң Кара-Хөл суурда Хензиг-оол Күжүгет көдээ культура бажыңы, Чөөн-Хемчик кожууннуң Культура хөгжүлдезиниң төвү, Чаа-Хөл кожууннуң Культура төвү тиилээн.
Ол албан черлери 3 млн рубль түңнүг субсидия акшазы-биле боттарының инфраструктуразын чаарткан: септелгелерни кылып, амгы үениң дериг-херекселдери-биле, ооң иштинде кадыкшылы кызыгаралыг кижилерге херек чүүлдер-биле дериттинип, библиотека фондузун долдуруп, чаа чогаадыкчы эгелээшкиннерни амыдыралга боттандырган.