Дүүн Кызылга тускай шериг операциязының киржикчилериниң тураскаалынга чечектер салыр езулал болур эрткен. Тураскаал комплекизиниң шөлүнге ужуп чоруур дуруяаларны немей кылганы-биле хемчегни эрттирген. Республиканың Баштыңы Владислав Ховалыг байырлыг езулалга киржип, мемориал комплекизиниң автору, Тываның улустуң мастери Байза Ондарга бистиң чаңгыс чер чурттугларывыстың маадырлыг чоруунуң сактыышкынын кадагалап арттырарынга үлүг-хуузун кииргени дээш, өөрүп четтиргенин илереткен.
«Мемориалдыг комплексте дээрже ужуп үнүпкен дуруяаларны немей кылган. Бо чүгле архитектурлуг немелде эвес, а чурттуң сонуургалдарын камгалаары-биле амы-тынын берген кижилерге өөрүп четтиргенивисти илереткен мөгейиг-дир. Өрү шаар ужуп үнген дуруяалар тайбыңның үнезин база дайынчыларның маадырлыг чоруу кезээ шагда уттундурбас дээрзин сагындырып чорзун» - деп, Владимир Ховалыг бодунуң блогунда бижээн.
Тускай шериг операциязының киржикчилеринге тураскаалды тускай шериг операциязында мөчээн маадырларның иелер комитеди болгаш Ада-чурт дайынчыларының өг-бүлелериниң комитединиң эгелээшкини база Кызылдың болгаш республиканың бүгү чурттакчыларының деткимчези-биле туткан. Улуг-Хемниң эриинде тураскаалды ийи күчүлүг дайынчыларны болгаш аныяк-чалыы херээженни — эмчи сестразын хүлерден шуткуп кылган. Тураскаалдың чоогунда мөчээн маадырларның аттарын бижээн самбыраларны тургузуп салган.
«Деткимче» регионалдыг фонд болгаш «Россети Сибирь Тываэнерго» АН төлевилелдиң боттаныышкынынга саң-хөө деткимчезин көргүскен.
2025 чылдың ноябрь 8-те, Ада-чурт камгалакчызының чылында болгаш Улуг Тиилелгениң 80 чылдаан оюнда мемориалды байырлыы-биле ажытканы чугула болуушкун болган.