Россияның социал фондузунуң Тыва Республиканың эргелели 2026 чылдың июньдан эгелеп регионнуң 15500 ажыг чурттакчыларынга чылдың өг-бүле төлевирлерин төлээн. Ниитизи-биле 530 млн рубль ажыг акшаны шилчиткен. Күрүнениң бо деткимче хемчээнче билдириишкин кииреринге чедир ийи неделя артканын, азы сентябрь 30-ге чедир ону киирип болурун республиканың чурттакчыларынга социал фонд салбыры сагындырган.
Төлевирни албан езузу-биле ажылдап турар ада-иелер, уруг азырап алган ада-иелер болгаш 18 харга чедир ийи азы оон хөй ажы-төл азырап турар (азы хүндүскү өөредилге черинде 23 харга чедир студентилиг) өг-бүлелер алырын сагындыраал. Ооң хемчээлди эрткен чылда орулгазындан төлээн үндүрүүнден болгаш ол-ла орулгадан 6 хуу ставкалыг үндүрүгнүң аразында ылгалдан санаар.
«Өг-бүле төлевирин чылда чаңгыс катап тыпсыр, а билдириишкиннерни июнь 1-ден сентябрь 30-ге чедир хүлээр. Бо деткимче хемчегни 15 муң ажыг чаңгыс чер-чурттугларывыс алган. Төлевирниң хемчээли билдириишкин киирген кижи бүрүзүнге аңгы-аңгы - оларның орулгазындан төлээн үндүрүүнден хамааржыр, бистиң регионда ол ортумаа-биле 34 муң рубль хире» - деп, РСФ-ниң Тыва Республикада салбырының даргазы Часкал Дараа дыңнаткан.
Төлевирни тодарадырда, өг-бүлениң орулгазынга болгаш эт-хөреңгизинге ниити үнелелди чорудар. Өг-бүлениң кижи санынга хамаарыштыр ортумак орулгазы чурттап турар регионунда амыдырап-чурттаарының кудуку хемчээлинден 1,5 катап хөй болбас ужурлуг. Ада-иези база ажы-төл РФ-тиң хамаатылары болгаш чурттуң доктаамал чурттакчылары болур ужурлуг. Билдириишкин киирген кижиниң ажы-төлге алимент өрези чок болур ужурлуг. 2025 чылда орулгадан хууда орулга үндүрүглерин төлээри – албан күүседир негелде. Эрткен чылын хууда орулга үндүрүглеринге хамааржыр өске орулга чок болган хуу сайгарлыкчылар болгаш боттарын ажыл-биле хандыртынган кижилер ол төлевирни албас.
Билдириишкиннерни сентябрь 30-ге чедир Күрүне ачы-дузазының порталы таварыштыр, РСФ-ниң Тыва Республикада клиент албанынче азы Хөй талалыг ажыл-чорудулгалыг төпче киирип болур. Шиитпирни 10 ажыл хүнүнүң дургузунда хүлээп алыр, ооң соонда акшазы беш ажыл хүнүнүң дургузунда шилчий бээр.
Регионнуң чурттакчылары немелде медээлерни РСФ-ниң чаңгыс аай контакт-төвүнче 8 800 100 00 01 дугаарлыг телефон-биле долгааш билип ап болур (долгаары халас, регионнуң шугуму понедельниктен четвергке чедир 9:00 шактан 18:00 шакка чедир, а пятницада 16:00 шакка чедир ажылдаар).