Кызылда Улусчу чогаадылга бажыңынга, А.С. Пушкин аттыг национал библиотеканың 95 чыл оюнга тураскааткан байырлыг хурал болуп эрткен. Тываның Баштыңы Владислав Ховалыг ол хемчегге хүндүлүг аалчы болуп киржип, албан чериниң шылгараңгай ажылдакчыларынга күрүне шаңналдарын тывыскан.
Владислав Ховалыг күрүне шаңналдарын тыпсыр байырлыг езулалды ажыдып тура, республиканың кол библиотеказының хоочуннарынга болгаш амгы ажылдакчыларынга юбилейи-биле байырны чедирип, библиотека фондузун ам-даа хөгжүдеринге, амгы үениң дериг-херекселдерин садып алырынга, чаа өөредилге төлевилелдерин боттандырарынга 1 млн рубльдиң акша сертификадын директор Ирина Эртинеге хүлээткен.
Республиканың Баштыңы байыр чедириишкининде, республиканың библиографтыг долу төөгүзүн чыыр, регионалдыг Ном палатазының чугула күрүне функциязын күүседип турар Национал библиотеканың тускай эрге-байдалын онзалап демдеглээн.
«Библиотеканың фондулары Россияның Ном тураскаалдарының күрүне реестринче кирген онзагай документилерни камныг кадагалап чоруур. Ол ховар национал эртинени кадагалап арттырары бедик профессионал деңнелди негеп турар, а силерниң специалистериңер ол даалганы ак сеткилдиг күүседип турарлар» - деп, Владислав Ховалыг демдеглээн.
Оон ыңай Национал библиотека «Культура» база «Өг-бүле» национал төлевилелдерниң идепкейлиг киржикчизи база, ооң ачы-хавыяазында республикада кандыг-даа назы-харлыг номчукчуларны хаара тудуптар черлер апарган амгы үениң модельдиг библиотекалары тургустунган. Библиотека ындыг шөлдерни тургузарының төлевилел офизи кылдыр ажылдап, ыраккы суурларның чурттакчыларынга билиглерже дең эргени хандырып турар.
Владислав Ховалыг чурттуң культурлуг өнчүзүн кадагалап арттырарынга, аныяктарның патриотчу болгаш хамааты харыысалгазын кижизидеринге, төөгүге хүндүткелин оттурарынга албан чериниң ажылдакчыларының ролюн демдеглээн: «Россияның Президентизиниң бадылааны чаңчылчаан российжи сүлде-сүзүк болгаш мөзү-шынар үнелиг чүүлдерин кадагалап, быжыглаар күрүне политиказын боттандырып турар силер» - деп, Тываның Баштыңы чугаалааш, мергежилинге бердингени, республиканың культурлуг өнчүзүн кадагалап, библиотекаларны бүгү Тываның хөгжүлделиг сорунза төвү кылдыр кадагалап арттырганы дээш, сеткилиниң ханызындан өөрүп четтиргенин илереткен.
Александр Сергеевич Пушкин аттыг Национал библиотеканың дараазында ажылдакчылары культура болгаш уран чүүл адырында хөй чылдарда ак сеткилдиг күш-ажылы дээш Тыва Республиканың Баштыңының өөрүп четтириишкинин алган:
- Донгак Уран Торжуевна – абонемент эргелекчизи;
- Кара-Сал Альбина Сортай-ооловна – документилер эмгелээр болгаш аайлаар килдистиң кол библиотекары.
Библиотека херээн хөгжүдеринге ачы-хавыяазы болгаш хөй чылдарда ак сеткилдиг ажылы дээш Тыва Республиканың Баштыңының Өөрүп четтириишкин бижиин дараазында ажылдакчыларга тывыскан:
- Ооржак Алефтина Николаевна – универсалдыг номчулга залының кол библиотекары;
- Сат Сайзана Викторовна – уран чүүл болгаш спорт талазы-биле литература килдизиниң эргелекчизи;
- Севиль Виктория Павловна – редакция-парлалга килдизиниң кол редактору;
- Салчак Виктория Олеговнва – информация-библиография килдизиниң эргелекчизи.
Александр Сергеевич Пушкин аттыг Национал библиотеканың уран чүүл болгаш спорт талазы-биле литература килдизиниң башкарыкчы библиогравы Бюрбю Людмила Александровна культурлуг сайзыралга үлүг-хуузу болгаш бедик профессионал чедиишкиннери дээш «Тыва Республиканың алдарлыг ажылдакчызы» хүндүлүг атка төлептиг болган.
Тыва Арат Республиканың Биче Хуралының Президиумунуң шиитпири-биле библиотеканы 1931 чылда Кызылга хоорай библиотеказы кылдыр баштай ажыткан. 1993 чылда «национал» эрге-байдалды аңаа тывысканы, чүгле национал ном өнчүзүн кадагалап арттырарынга ооң онзагай ролюн демдеглээн эвес, а фондуну тургузарынга, эртем- методиктиг ажылдарны чорударынга, республиканың чурттакчыларынга информацияның чедингирин хандырарынга элээн каш шыңгыы хүлээлгелерни тургускан.