Тываның Баштыңы Кызылдың хоочуннар болгаш инвалидтер бажыңынга дүүн четкен. Албан чериниң ора-саваларын хынап, чурттакчылар болгаш ажылдакчылар-биле чугаалашкан соонда, Владислав Ховалыг чаа директорну таныштырган. Тускай шериг операциязының хоочуну, «Тываның маадырлары» регионалдыг программаның доозукчузу Эртине Кара-Салды Кызылдың хоочуннар бажыңының чаа директорунга томуйлаан.
Владислав Ховалыг бажың-интернаттың оран-савазын эргий кезээш, албан чериниң ээлчеглиг капитал септелгезин кылыр аргаларны сайгарып көөрүн ооң куратору – ТР-ниң Күш-ажыл болгаш социал политика яамызынга дааскан.
«Бо чоокку чылдарда оран-саваның көвей кезиин чаартыр херек деп демдеглээш, капитал септелгени чадалап кылыр аргазын өөренип көөрүн чагыдым. Эмчи ажылдакчыларының чедишпезин бо чоокку үеде шиитпирлээр бис, ол айтырыг шиитпирлеттинер. Хоочуннарның аай-дедир чоруурунга болгаш экскурсиялаарынга автобустан аңгылап бээр дээн дилээнге дорт харыылап тур мен – албан чери транспорттуг болур» - деп, Владислав Ховалыг бодунуң блогунда бижээн.
Владислав Ховалыг Ада-чурт камгалакчызы фондунуң регионалдыг салбырының директорунуң оралакчызы болуп ажылдап турган Эртине Кара-Сал чаа директор болганын таныштырып, чаа харыысалгалыг албан-дужаалынга чедиишкиннерни күзээн.
Тыва Республиканың Чазаа 1983 чылда пенсионерлерге албан черин ажыдар дугайында доктаалды хүлээп алганы-биле, Кызылдың хоочуннар болгаш инвалидтер бажың-интернадының төөгүзү эгелээн. Албан чери 1984 чылдың октябрь 14-те албан езузу-биле ажыттынган.
Пенсионерлер, күш-ажылдың хоочуннары, Ада-чурттуң Улуг дайынының киржикчилери, тылдың ишчилери дээш, улуг назылыг кижилерге комплекстиг дуза болгаш деткимчени көргүзер республикада бир дугаар албан чери кылдыр санаттынар.
Амгы үеде социал албан чериниң 119 ажылдакчызы 180 чурттакчыга тускай дузаны көргүзүп турар. Бажың-интернатта улуг назылыглар болгаш шимчей албан кижилерге чурттаар болгаш дыштанырын, ол ышкаш кадыкшылын быжыглаарынга чогуру байдалдарны тургускан. Социал ачы-дуза алыкчыларынга социал реабилитация хемчеглер эртип турар.