Сентябрьның 14-тен 17 хүннеринде, Тыва Республиканың Күрүне тугунуң хүнүнге тураскааткан патриотчу, культурлуг, спортчу байырлал хемчеглерин эрттирери чаңчыл апарган. Тываның күрүне демдектериниң төөгүзүн болгаш республиканың чурттакчыларынга оларның ужур-утказын онзалап көргүзери – ооң кол сорулгазы.
Республиканың болгаш чурттуң күрүне демдектерин тудуп алган авточарыш – кол болуушкуннарның бирээзи. Сентябрь 17-де 11:00 шакта бадылааны орукка ол эгелээр. 11:30 шакта Дөгээ даанга Тыва Республиканың Күрүне тугун көдүрер.
Байырлал хүнүнде культурлуг болгаш чырыдыышкынныг төлевилелдерни эрттирер. Кызылдың библиотекаларында «Тывамның тугу» база «Республика тугу – бистиң чоргааралывыс» деп темалыг номнар болгаш чуруктар делгелгелери болур, а школачыларга күрүне тугунуң төөгүзүнге болгаш ужур-утказынга хамаарышкан чурт-шинчилелдиг беседаларны организастаар.
Өөредилге албан черлеринге темалыг класс шактары болгаш Россияның болгаш Тываның күрүне туктарын көдүрер езулалдар болур. Аныяктарга «Тываның тугу – бистиң чоргааралывыс» деп патриотчу хемчег-биле үш өңнүг кожааларны болгаш тукчугаштарны үлеп, «Аңгыр-оолдуң тоожузу» деп уран-чечен кинону көргүзер.
Республиканың Күрүне тугунуң хүнүнге тураскааткан көжүп чоруур концерт-оюн-тоглаалыг программаны найысылалдың чурттакчыларынга белеткээн. Оон аңгыда «Тываның тугу шыпшыкта» деп флеш-моб база «Ыдык демдектерни тып» деп виртуалдыг квест болур.