2026 чылдың сентябрь 15-те «Динамо» бүгү-российжи күш-культура-спорт ниитилелиниң Тывада регионалдыг салбыры тургустунганындан бээр 81 чыл болуп турар.
Организация он-он чылдарның дургузунда күш-культура болгаш тускай албан-хүлээлгелиг спорттуң хөгжүлдезинге, айыыл чок чорук болгаш эрге-хоойлу камгалаар ажылдакчыларның күш-шыдал белеткелин быжыглаарынга, аныяктарның кижизидилгезинге улуг үлүг-хуузун киирип чоруур.
Республиканың корум-чурум камгалаар органнарының кады ажылдажылгазы ниитилелдиң ажыл-чорудулгазында кол черни ээлеп турар. Амгы үеде «Динамо» ниитилелдиң Тывада регионалдыг салбырын Россияның Федералдыг айыыл чок чорук албанының Тыва Республика талазы-биле эргелелиниң начальниги удуртуп турар. Ол Тываның Чазаа болгаш ТР-ниң Спорт яамызы-биле кады ажылдап, спортчу коллективтерниң спортчу адырда ведомстволар аразында кады ажылдажылгазын хөгжүдүп, быжыглаарынче угланган ажылды демнештирип турар.
Амгы үеде Тываның «Динамо» ниитилели 3000 ажыг спортчуларны мөөңнээн, ооң иштинде 78 «аныяк динамочулар» бар. 63 спортчулар спорт мастерлери аттыг, оларның аразында делегей чергелиг класстың 4 спорт мастери, 100 ажыг спорт мастерлери, спорттуң янзы-бүрү хевирлеринде спортчу разрядтарлыг 300 ажыг спортчулар бар.
«Динамо» ниитилелдиң 81 чылдыг төөгүзүнде салгалдарның уламчызы, спортчу чаңчылдарны кадагалап арттырары, Ада-чурттуң камгалакчыларының күш-шыдал белеткелин быжыглаары дээн, дес-дараалашкак ажылдар хөй.
Хоочуннарның чедиишкиннери чаа-чаа тиилелгелерниң үндезинин салган болза, амгы үениң динаможулары спортка болгаш Төрээн чуртунга он-он чылдар дургузунда бараан болган оларның ажыл-херээн уламчылап чоруур.
Россияның ФАА Тыва Республикада эргелелиниң парлалга-албанының медээзинден.