Тыва тускай шериг операциязының киржикчилеринге деткимче хемчеглерин доктаамал калбартып турар. Тускай шериг операцияларынга алган кемдээшкиннеринден инвалид болган 378 кижи 2026 чылда чаңгыс удаа бээр материалдыг дузаламчыны алган. Ол төлевирлерже республика бюджединден 16 млн ажыг рубльди тускайлаан.
Бо чылдың эгезинде Тываның Дээди Хуралынга Айыткалының үезинде чарлаан бо деткимче хемчээн Республиканың Баштыңы Владислав Ховалыгның эгелээшкини-биле киирген. Кол сорулгазы – тускай шериг операциязының үезинде дайынчы хүлээлгезин күүседип тургаш, балыгланган, бажы кемдээн, бертик-межел болган кижилерге адрестиг немелде дузаны чедирер.
Чаңгыс удаа бээр төлевирниң хемчээли тургускан инвалид бөлүүнден хамааржыр:
I бөлүк — 100 муң рублей;
II бөлүк — 50 муң рублей;
III бөлүк — 30 муң рублей.
Амгы үеде тускай шериг операциязының 378 дайынчызынга, оларның аразында I бөлүктүң инвалиди 23, II бөлүктүң инвалиди 154, III бөлүктүң инвалиди 201 хоочуннарга төлевирлерни төлээн.
Бо чылын республика бюджединде ол деткимче хемчеглеринге 19 млн рубльди тускайлаан. Ынчангаш планнаттынган акша-хөреңгиниң 84 ажыг хуузун деткимче алыкчылары алган.
Тываның Баштыңы Владислав Ховалыг ТШО киржикчилеринге болгаш оларның өг-бүлелеринге күрүне деткимчезин үезинде база, алыры таарымчалыг кылдыр кылырын айыткан турган.
«Аңгы-аңгы органнарның көргүскен дузазы ТШО-нуң киржикчи бүрүзүнге болгаш оларның өг-бүле кежигүннеринге билдингир болгаш, ону «чаңгыс соңга» таварыштыр көргүзери эптиг байдалды тургузар ужурлуг» - деп, Владислав Ховалыг демдеглээн.
Бөгүн төлевирни Тыва Республиканың Күш-ажыл болгаш социал политика яамызынче азы чурттап турар чериңерде Хөй талалыг ажыл-чорудулгалыг төпче билдириишкин кииргеш ап болур. Тыва Республиканың девискээринде доктаамал бүрүткелдиг болгаш чурттуң өске регионнарындан ындыг деткимче албаан ТШО киржикчилери төлевирни алыр эргелиг.