Тываның кадрлар төвүнүң ажылдакчылары бо чылдың сес айында хосталгазын казыттырып шииттирип чорааш, хосталып келген билдириишкин киирген кижилерниң үш кезиин, азы 32 кижини ажылче киирген. Эрткен чылын шак ол бөлүкке хамааржыр 37 кижини ажылга тургускан. Тыва Республикада федералдыг кеземче күүселде албанының эргелели-биле хосталырынга белеткенип турар хууда кижилерни деткиир реабилитация системаның кады ажылдажылгазының бир кезии ол.
Тыва Республикада федералдыг кеземче күүселде албанының эргелели-биле кеземче херээ эртип турар кижилерниң социал-экономиктиг адаптация программазын боттандырар ажыл-биле албанның специалистери хосталыр деп турар кижилерге 42 деткимче программазын ажылдап кылган. Эдип-чазаар албан черлеринге 14 үнүүшкүннүг ужуражылга-консультацияларны болгаш ажылчын олуттар ярмаркаларын организастаан. Оон аңгыда, кадрлар төвү хосталган кижилерге социал керээ программазынга киржиринге методиктиг деткимчени болгаш үделгени көргүскен.
Чонну ажылга хаара тудар төптүң ажылдакчылары он кижиге бизнес-планнар тургузарынга дузалаан, олар ону чедиишкинниг камгалааш, боттарының херээн ажытканнар. Программаның база бир киржикчизин өөредип чоруткан — ол ам кондитер мергежилин шиңгээдип турар.
«Хосталгаже үне берген кижилерге коргуушкун болгаш бодунга бүзүревес чорукту ажып эртери дыка берге. Кажанда-даа ону эрте бээр аргалар бар деп көргүзери – бистиң сорулгавыс. Бир эвес эртем-билии чок болза, халас өөредип, ажыл берикчизин тып берип, бизнес ажыдар идеязы бар болза, ону ажылдап кылырынга дузалажыр бис. Ол кижиде амыдыралын өскертир күзелдиң бары эң чугула, ынчан бис оларны деткип, орукту кады эртер бис» - деп, Тываның кадрлар төвүнүң килдис начальниги Алдынай Сержи чугаалаан.
Бо чылдың сес айларында шииттирип чораан 81 кижи, оларның 16 хуузу херээжен улус Тываның кадрлар төвүнден ажыл тыпчып бээр дузаны дилээн. Билдириишкин киирген улустуң хөй кезии тускай эртем-билии чок-даа болза, хоойлу езугаар ажылга тургустунарынга база социал адаптацияны эртеринге белен болганы эң кол деп, специалистер демдеглээн.