Тываның Баштыңы Владислав Ховалыг Каа-Хем кожуунга ажылчын сургакчылаашкын үезинде социал объектилерниң байдалын хынап, тудугнуң болгаш септелгениң темпизин көрүп, илереттинген четпестерни шиитпирлээр даалгаларны берген.
Владислав Ховалыг муниципалдыг бюджет акшаландырыышкыны-биле амгы чаартылгалар чоруп турар Кундустуг суурда Культура бажыңында четкен. Республиканың Баштыңы чаа хөгжүм аппаратуразын белекке берип, албан черин деткээн.
Ол чорааш, ангар хевирлиг спорт залының тудуунче онза кичээнгейни углаан. Объектиниң одалга системазын эптеп тургузуп эгелээн. Октябрь төнчүзүнге чедир ажылдар доосту бээрин тудугжулар бүзүреткен. Регионнуң удуртукчузу тудугнуң темпизин кошкатпайн, сооктар дүшкүжеге, чогуур хуусаазында ажылдарны доозарын чедип алырын тус чер чагыргазы биле тудуг организациязынга чагаан.
Тываның Баштыңы суур школазының өөреникчилери болгаш башкылар-биле ужурашкан. Школага капитал септелге чугула негеттинип турар, оон аңгыда спортчу база улуг залдары чок. Владислав Ховалыг уруглар амгы болгаш таарымчалыг байдалдарынга өөренир кылдыр школаны септээриниң аргаларын өөренип, шиитпирни үндүрерин чогуур удуртукчуларга дааскан.
Ол ышкаш Сарыг-Септе Аныяктар эгелээшкиннериниң төвүнүң тудуу кайы хире келгенин база хынаан. 1970 чылдарда туттунган эрги автостанция бажыңында улуг хемчээлдиг чаартылга ажылдары чоруп турар. Септелге ажылдары доосту бээрге, ынаар «Баштайгыларның шимчээшкининиң» салбыры көжүп кирер, ол ышкаш чогаадыкчы ажылдар шөлүн болгаш спортчу булуңну тускайлаар. Ооң дизайн төлевилелин ажылдап кылган. Объект келир айда ажыглалче кирер ужурлуг. Ынчангаш керээ чарган организацияга ажылдарны дүргедедип, тудугну хуусаазында дужаарын сагындырган.
Владислав Ховалыг Мерген арбанынга чорааш, күрүне ажылдакчызы, чогаалчы Салчак Токаның чаарттынган тураскаалының ажыдыышкынынга киришкен. Бо чылын ооң төрүттүнгенинден бээр 125 чылы болуп турар. «Амыдыралга инфраструктура» национал төлевилелдиң «Таарымчалыг хоорай хүрээлелин тургузары» федералдыг төлевилел-биле чаагайжыдылга ажылдарын чоруткан.
«Салчак Калбакхорековичиниң мерген угааны база бурунгаар көрүжү бүгү Тываның хөгжүлдезин тодараткан, ооң төрээн черинге бердингени чонунга бараалгалдың үлегери болуп артар. Мында, Мергенниң чурттакчылары шылгараңгай чаңгыс чер чуртуунуң дугайында сактыышкынны камныг кадагалап, ооң ат-алдарынга чоргаарланып чоруурлар» - деп, республиканың Баштыңы демдеглээн.