Тываның Баштыңы Владислав Ховалыг Улуг-Хем кожуунга ажыл-агыйжы сургакчылаашкын үезинде, социал инфраструктура объектилериниң байдалын болгаш хөгжүлдезин хынап, чурттакчылар-биле ужуражып, көдээ суурларның спортчу, дыштанылга, культурлуг амыдыралынга амгы үениң байдалдарын тургузарының дараазында базымнарын тодараткан.
Республиканың Баштыңы Арыг-Бажы суурнуң чурттакчыларының чидиг айтырыгларын чугаалашкан. Оларның бирээзи – спортчу инфраструктураны хөгжүдери. Суурда «Эзирлер уязы» спорт залды туткан-даа болза, уруглар спортун долузу-биле сайзырадырда, амгы үениң аңгы спорт залы херек.
Чурттакчы чон ажы-төлүнүң спортта идепкейлиг белеткелин, аңгы-аңгы деңнелдиг маргылдааларга киржип турарын чугаалаан. Адалар чөвүлелиниң төлээзи Доспан Айдын спортчу объектилерни тутканы уругларның кичээлдээринге болгаш сайзыралынга немелде аргаларны тургускан дээрзин демдеглээн.
Владислав Ховалыг ужуражылга соонда, Арыг-Бажынга спорт зал тудуун чоокку чылдарда планже киирерин чогуур ведомстволарга дааскан. Суурнуң Культура бажыңынга капитал септелге негеттинип турары-биле аңгы даалганы база берген.
«Чон-биле шак-ла мындыг ужуражылгалар мурнады шиитпирлээр угланыышкыннарны болгаш дараазында базымнарны планнаарынга дузалаар. Кижилерниң дыштанырынга болгаш тренировкалаарынга амгы үениң эптиг байдалдарын тургузар херек» - деп, Тываның Баштыңы демдеглээн.
Көдээ черлерде социал инфраструктураны хөгжүдер талазы-биле элээн каш угланыышкыннарда ажылдар деңге чоруп турар. Владислав Ховалыг Арыг-Үзүүде эрги клубтуң орнунга «Сорунза» губернатор төлевилели-биле туттунуп турар чаа культура бажыңының тудуун хынаан. Таваан куткаш, чер адааның коммуникация ажылдарын доозуп, кудуун каскан. Тудугжулар тудугнуң ханаларын тудуп үндүрген: фойе биле көрүкчүлер залының овур-хевири үнүп келген. Соңгалар болгаш эжиктерни эккелген, ам оларны салыры арткан.
Культура бажыңының чепсеглээшкининче онза кичээнгей угланган. Сандайлар, сцена хептери, чугула дериг-херекселдер белен. Ынчангаш тудуг ажылдары доосту бээрге-ле, объект долу күжү-биле ажылдаарынга херек бүгү чүүлдерни четчелээн. Тудуг ажылдары ноябрь төнчүзүнге чедир доостур ужурлуг. Тываның Баштыңы объектини айыттынган хуусаазында ажыглалче киирер дээш, доктаамал хайгааралга тударын дааскан.
Владислав Ховалыг Шагаан-Арыгга чорааш, чаа күш-культура-кадыкшылга комплекизин база көрген. Ол белеткел шөлдерин болгаш техниктиг дериг-херекселди хынап, комплекстиң ажылдакчылары болгаш кижизидикчилери-биле чугаалашкан.
Тываның Баштыңы чурттакчы чоннуң херек кырында хереглелдеринге социал инфраструктураның хөгжүлдези дүгжүр ужурлуг дээрзин демдеглээн. Уруглар, өг-бүлелер болгаш чурттакчы чоннуң шуптузунга херек объектилер - мурнады боттандырар угланыышкыннарда. Ажыл-агыйжы чоруктуң түңнелинде, хөгжүлде планнарынче чаа объектилерни киирерин база эгелеп алган төлевилелдерниң күүселдезинге контрольду хандырарын чогуур ведомстволарга дааскан.