Делегейниң 191 чурттарындан 10 муң киржикчилерни хаара туткан 2026 чылдың делегей чергелиг аныяктар фестивалы Екатеринбург хоорайда болуп эртип турар. Бо улуг хемчээлдиг шуулганда Тывадан төлээлер база киржип турарлар.
«Тиилелгениң волонтерлары» бүгү-российжи хөй-ниити шимчээшкининиң Тывада регионалдыг салбырының удуртукчузу Азияна Увангур тыва делегацияны удуртуп чоруур. Республикадан делегацияның кежигүннери «Күзелдиң кыйгызы-биле» деп девиз-биле эртип турар фестивальдың өөредилге, культура болгаш хөй-ниити программазынга киржирлер.
Фестивальдың уруглар трегинге Тываның киржилгези программада онзагай черни ээлээр. 17 харга чедир уруглар программазынга киржир кылдыр шилиттинген 99 чурттардан 1000 аныяк оолдар санынче Кызылдың школачызы Темир Лопсан кирген. Темир республиканың хөй-ниити амыдыралында киржип, журналистиканы сонуургап, медиаугланыышкынны идепкейлиг сайзырадып турар. Ол Кызылга августа эрткен делегей чергелиг буддийжи шуулганга медиа-волонтерлааш, делегей чергелиг улуг шөлге ажылдаар арга-дуржулганы алган.
Фестивальга республиканың киржилгези – тыва аныяктарның арга-шинээн, бот-идепкейин, хөгжүлдеже чүткүлүн көргүзүп, ниитилел ужур-дузалыг төлевилелдерге киржир арганы бээр. Делегей чергелиг шөлдер оларга төрээн регионун таныштырып, республикадан дашкаар профессионал болгаш найыралчы харылзааны тудар арганы берип турар.
2026 чылдың делегей чергелиг аныяктар фестивалы сентябрь 11-ден 17-ге чедир Екатеринбург хоорайга болуп эртер. Ону Аныяктар херектериниң талазы-биле федералдыг агентилел база Свердловск облазының Чазаа организастаан. Тываның Аныяктар херектериниң талазы-биле яамызының деткимчези-биле Тыва Республиканың делегациязы ында киржип турар.