Тываның Баштыңы Мөңгүн-Тайга кожуунга сургакчылап чорааш, Мугур-Аксы суурда аныяктар төвүнүң оран-савазында капитал септелге ажылдарын хынаан. «Аныяктар болгаш уруглар» национал төлевилелдиң «Аныяктарга регион» федералдыг программа боттандырылгазы-биле ында эде тудуушкун ажылдары чоруп турар.
«Чедери берге ыраккы кожуунче материалдарны чедирериниң оруу берге-даа болза, шупту ажылдар октябрь ортан үезинде доостур деп, тудугжулар бүзүреткен. Бо дээрге тус черниң аныяктарының үрде манааны болуушкун-дур: чаа төп амгы үениң оран-савазы болурундан аңгыда, чогаадыкчы чоруктуң, харылзааның болгаш бот-сайзыралдың шөлү апаар» - деп, Владислав Ховалыг хыналда соонда бодунуң блогунда бижээн.
2026 чылда регион аныяктар политиказын комплекстиг хөгжүдер «Аныяктарга регион» деп федералдыг программага киришкеш, Сарыг-Сеп суурда болгаш Ак-Довурак хоорайда аныяктар инфраструктуразының объектилерин бо чылын тудар. Мугур-Аксы биле Сарыг-Септе октаттынган тудугларга капитал септелгени чоруткаш, аңаа аныяктар төптерин ажыдар. Ынчалдыр Сарыг-Септиң эрги автовокзалын төп кылдыр эде тудар. Мугур-Аксында башкыларның эргиде ниити чуртталга бажыңын ол сорулгага эде кылыр. Эде чаартылга соонда, оран-саваны сөөлгү үениң технологиязы база амгы үениң эт-севи-биле дериир.
Ак-Довуракта «Салгал» аныяктар төвүн Аныяктар херектериниң талазы-биле федералдыг агентилелдиң деткимчези-биле 15 муң чедир чурттакчылыг биче суурларга чедимчелиг шиитпир болур модульдуг тудуг аргазын ажыглап тудуп турар. Ак-Довуракта «Өлчей» школазы биле 2 дугаар школаның чанынга чаа төп туттунар.
Федералдыг бюджеттен субсидияны төлевилелдер күүселдезинче тускайлаан.
Владислав Ховалыг ажыглалче киирген чаа шөлдер аныяктарны сорунзалай тырттарынга чаа аргаларны бээр деп, бүзүрелдиг чугаалаан.