Бөгүн, сентябрь 11-де, Россияда Элээр чорук хүнүн демдеглеп турар. Бо хүнде чурттуң регионнарында араганың уржуктарының болгаш кижи бодунуң кадыынга харыысалгалыг болурунуң чугулазын демдеглээн өөредиглиг болгаш профилактиктиг хемчеглер эрттирип турар.
«Тывага быжыг өг-бүлелерге болгаш ужур-чаңчылдарга хүндүткелди илереткен бо хүн кадык амыдыралдың ужур-утказының дугайында сагындырып турар чугула» - деп, Тываның Баштыңы Владислав Ховалыг демдеглээн.
Республикада кадык амыдыралдың культуразын хевирлээр талазы-биле ажылдар доктаамал чоруп турар. Чурттакчы чонну эвилелдеп, муниципалитеттерде таарымчалыг болгаш айыыл чок хүрээлелди тургузарынче угланган эгелээшкиннерни деткип турар ындыг төлевилелдерниң бирээзи «Элээр суур» мөөрей болур. Регионда арага садар шактар база кызыгаарлыг.
Өг-бүлениң ужур-чаңчылдарын нептередири – аңгы угланыышкын. Арага чок куда байырлалдарын, национал ёзу-чаңчылдарны, ужур-дүрүмнерни шилип ап турар аныяк өг-бүлелер саны көвүдээн.
Чылдың-на марттың 22-де Тывада Элээр чорукту суртаалдар хүннү база демдеглеп турар. Амыдыралдың идепкейлиг овур-хевирин суртаалдаарынга кол черни спортчу инфраструктураны хөгжүдери ээлеп турар: республикада чаа спорт залдары туттунуп, шөлчүгештер чаарттынып, күш-культура-биле доктаамал кичээлдээринге байдалдар тургустунган.
«Кижи бүрүзү бодун камнап, аас-кежикти, тургузукчу күш-ажылды, амыдыралдың идепкейлиг овур-хевирин шилип алырын кыйгырып тур мен» - деп, республиканың Баштыңы МАХ-та бодунуң каналынга бижээн.