Тываның Баштыңы республиканың кожууннарында тудуг шөлдерин база социал болгаш муниципалдыг инфраструктура объектилерин хынап, ажылчын үнүүшкүннерни кылып турар. Владислав Ховалыг ооң мурнунда хүнде ыраккы Өвүр, Мөңгүн-Тайга, Бай-Тайга кожууннарга барып, социал ужур-дузалыг объектилерде тудуг ажылдарын көрген.
Мөңгүн-Тайга кожууннуң чедери берге Кызыл-Хая суурда 176 өөреникчиге спорт залдыг школаның тудуунга база катап четкен. Тываның Баштыңы бо чылдың июльда объектиге четкеш, тудуг черинге ажылдың темпизин салбайн, тудугжулар санын көвүдедерин дааскан турган.
Суурнуң чурттакчыларының хөй санныг дилеглери-биле Кызыл-Хаяга школа тудар айтырыгны «Чаңгыс демниг Россияның» Улусчу программазынче каш чыл бурунгаар киирген. Кызыл-хаяжыларның бо күзели бөгүн боттанып турар.
Тудуг шөлүнде ажылчыннарны хөйү-биле хаара тутканындан, ажылдар көзүлдүр дүргедей бергенин ээлчеглиг хыналда көргүскен. Владислав Ховалыг школаның тудуу 50 хуу чеде бергенин көргеш, темпини кошкатпазын тудугжуларга чагаан.
«Ыраккы суурлар дивейн, шынарлыг өөредилгени чедип алырынга бүгү-ле байдалдарны тургузары биске чугула. Кызыл-Хаяда чаа школа Тываның ажы-төлүнге дең арганы бээринге база бир базым-дыр» - деп, ол хыналда соонда бодунуң блогунда бижээн.
Владислав Ховалыг бүдүн кожуунга онзагай болуушкун – сентябрьда Мугур-Аксы суурда ажыттынган тус черниң асфальт-бетон заводунга бүдүрген холуксаа-биле суурнуң төп кудумчузун шып эгелээниниң херечизи болган.
Регионнуң удуртукчузунуң инициативазы-биле Мөңгүн-Тайга болгаш кожа-хелбээ ыраккы кожууннарның транспорт чедингирин шиитпирлээр дээш, асфальт-бетон заводун туткан. Муниципалдыг тургузуг бодунуң девискээринде бүдүрүлгези-биле курлавырларны ажыглап, оруктарны чаартып, тудуп ап болур.
Орукчулар кол кудумчунуң 3 километр узун оруун бир ай дургузунда асфальтаар деп планнаан. Тротуарларын чаагайжыдары база көрдүнген. Чаартынган оруктар чурттакчыларның амыдырал-чуртталгазын чүгле экижидеринден аңгыда, орук шимчээшкининиң айыыл чок чоруун база хандырар.
Владислав Ховалыг шак ындыг чаартылгалар кожууннуң чоок-кавы суурларын база манап турарын бүзүреткен.