Өвүр кожуунда Хандагайты суурже кирер 7 километр оруктуң септелгези доозулган. Ооң мурнунда багай байдалда турган орук участогун чогуур негелдеге дүүштүр кылган. Тываның Баштыңы Владислав Ховалыг ажыл-агыйжы үнүүшкүн үезинде ажылды хынаан.
«Чоннуң үзел-бодалдары бистиң ажылывыста кол угланыышкын болуп турар. Хандагайтыга тус черниң чурттакчылары-биле ужураштым. Оларның өөрүп четтиргениниң сөстерин дыңнаары өөрүнчүг болду: төрээн сууру эки оруктарлыг, асфальт кудумчуларлыг апарганынга чон амырап турар. Сагыш-сеткилден ындыг үнелелдерни алыр дээш, ажылдаар апаар» - деп, Владислав Ховалыг демдеглээн.
Бо участоктуң септелгези июльда эгелээш, кончуг дүрген доозулган. Ооң-биле чергелештир Оттук-Даш суур чоогунда 11 км айыылдыг участоктарны септеп чаагайжыткаш, ол угланыышкында орук шимчээшкининиң айыыл чок чоруун бедиткен.
Өвүр кожуунда орук ажылдары ам-даа улачылавышаан. Бо чоокку чылдарда Чадаана — Хандагайты оруунуң база 20 километрин септээри планнаттынган. Бо чүүл кожууннуң эң кол транспорт оруктарының бирээзин чоорту экижидер ужурлуг.
Хандагайтының чурттакчыларынга оруктуң чаартылгазы үрде манааны үре-түңнелдиг ажыл болган. Суурже кирер орук участогундан аңгыда, суурнуң кудумчуларын асфальтылаанындан, чурттакчыларның хүн бүрүде амыдыралының шынары өскерилген.
Орук инфраструктуразын хөгжүдери Тываның Чазааның мурнады хөгжүдер айтырыының бирээзи бооп артпышаан. Регионалдыг автооруктарны болгаш айыылдыг участоктарны септээринден эгелээш, суурлар иштинде оруктарны чаагайжыдарынга чедир ажылдар доктаамал кылдынып турар. Чурттакчы чоннуң айыыл чок болгаш эптиг аргыжылгазын хандырары база республика иштинге транспорттуң чедингирин экижидери – кол сорулга ол.