Кадыг коммуналдыг боктар болбаазырадыр регионалдыг оператор – ТСП КУБ хереглекчилерден өрелер чыырының шалыпчы айын чарлаан. Кижилерниң болгаш юридиктиг черлерниң, ол ышкаш чуртталга оран-савазынга хамаарышпас черлер ээлериниң бок дээш өрезиниң ниити түңү 15,8 млн рубль ажа берген. Хереглекчилерниң төлевир чуруму – регион чурттакчыларның богун чыып-сөөртүрде доктаамал ажылдаарының, девискээрлерниң экологтуг чаагай чоруун хандырарының кол дөзү болур.
Өрениң хөй кезии өөредилге, кадык камгалал, культура, спорт болгаш социал камгалал адырлары-биле холбаалыг социал организацияларга хамааржыр деп бүдүрүлге дыңнаткан. А анаа хереглекчилерниң ону төлээриниң талазы-биле чуруму эки.
Миллион-миллион, чүс-чүс муң өрелерни кара өжегерээн чыып алган черлер санында «Чаагайжыдылга» МУБ, ТР-ниң Перинаталдыг төвү, Кызылдың № 5 гимназиязы, «ТР-ниң Онза камгалалдыг бойдус девискээрлериниң дирекциязы» КБА бар.
Муниципалдыг тургузуглардан Таңды, Чеди-Хөл, Улуг-Хем, Кызыл, Сүт-Хөл – бо кожууннарның хергелекчилериниң өрелери база көвүдээн.
Хереглекчилерниң өрелери бүдүрүлгениң кывар-чаар чүүл садып алырынга, техника ажаап-тежээринге хамаарышкан ажылдарынга бергедээшкиннерни тургузуп, а ол чүүл бокту чыып-сөөртүрүнге уржукту чедирип турар деп, «ТСП» КУБ дыңнаткан.
Хуу кижилер болгаш юридиктиг черлер дээш, дыка хөй хереглекчилер боктарын үндүр салып турза-даа, богун үндүр сөөртүрүнге керээлер ам-даа чарбаанын демдеглезе чогуур.
Сайгарлыкчы ажылды чорудуп турар юридиктиг черлер шупту кадыг коммуналдыг бокту сөөртүр керээни албан чарарын регионалдыг оператор база катап сагындырган. Керээзи чок болза, азы регионалдыг операторнуң сагындырыын херекке албас болза, торгаалдарга онаажып болур. Албан-дужаалдыг кижилерге административтиг торгаалдың хемчээли 10 муңдан 30 муң рубль, сайгарлыкчыларга 30 муңдан 50 муң рубль, азы ажыл-чорудулгазын 90 хонук чедир соксадыр административтиг доктаалды тутсур. Юридиктиг черлерге торгаалдың хемчээли 100 муңдан 250 муң рубль, азы ажыл-чорудулгазын 90 хонукка чедир соксадыр административтиг торгаал бар.
Регионалдыг оператор суд шиитпиринге даянгаш өрезин албададып тырттырбазы-биле, бүдүрүлгениң килдизинче баргаш, өрезин төлеп алырынче хереглекчилерни кыйгырган.
Хереглекчилер бухгалтерияның 5-39-10 (204) дугаарынче долгааш, ачы-дуза дээш түңнү санаанын болгаш канчаар төлээрин айтырып болур. Бок сөөртүр керээни чарар, азы бар керээзин чаартыр дизе, Кызыл хоорайның Кочетов кудумчузунуң 30 дугаар бажыңында 15-ки кабинетте керээлер килдизинге баар. Харылзажыр дугаары - 89133501174.
Айыттынган килдистиң специалистери керээлер, санаашкыннар болгаш төлевирлер дугайында чугула медээлерни берип, кыска хуусаада төлевирлерни долдуруптарынга дузалажыр.