Россияның Чазаа республиканың 1 дугаар эмнелгезинге база Тыва Республиканың Перинаталдыг төвүнге амгы үениң эмчи дериг-херекселдерин садып алыры-биле Тывага 190 млн рубльди аңгылаан.
Чазак Даргазы Михаил Мишустин аңаа хамаарышкан чогуур айтыышкынга атты салган. Акша-хөреңгини Тывага 99 хуу федералдыг кады акшаландырыышкынныг федералдыг бюджет субсидиязы кылдыр бээр.
Бо чылдың августа Михаил Мишустинниң Тывага ажыл-албан аайы-биле кээп чораан үезинде чедип алган дугуржулгалар соонда, федералдыг деткимчени көргүзер дугайында шиитпир хүлээп алдынган. Республикада кадык камгалал объектилеринге чорда, регионнуң эмнелге албан черлерин амгы үениң дериг-херекселдери-биле чепсеглээр айтырыг ынчан көдүрүлген. Республиканың 1 дугаар эмнелгезиниң кол эмчизи Вячеслав Ховалыг Россияның Чазааның Даргазынга херек дериг-херекселди садып алырынга дузалажыр дилегни киирген.
Республиканың №1 эмнелгези база Перинаталдыг төп тускайлаан акша-хөреңги-биле 28 эмнелге дериг-херекселдерин садып алгаш, ажыглалче киирерин планнаан. Федералдыг бо деткимче республиканың кол эмнелге албан черлериниң материал-техниктиг баазазын чаартып, Тываның чурттакчыларынга амгы үениң бедик шынарлыг эмчи дузазын чедиреринге немелде аргаларны тургузарынга дузалаар.