Эрткен чылын республиканың Баштыңы Владислав Ховалыгның саналы-биле тургустунган байырлал Хөй ажы-төлдүг өг-бүлелер хүнүн Тыва сентябрь 19-та демдеглээр. Чылдың-на сентябрьның үшкү субботазында эртип турар ол байырлал өг-бүлениң, ада-иениң онзагай ролюн, хөй ажы-төлдү кижизидериниң чаңчылдарын көргүзер сорулгалыг.
Республика эмчи, социал, культурлуг, өөредилге, спортчу төлевилелдерни каттыштырган комплекстиг хемчеглер программазын байырлалга белеткээн. Неделя дургузунда хөй ажы-төлдүг өг-бүлелер өг-бүле фестивальдары болгаш мөөрейлеринге, спортчу эстафеталарга, чогаадыкчы программаларга киржип, специалистерниң консультацияларын ап, профилактиктиг эмчи шинчилгезин эртип болур.
Программа хөй ажы-төлдүг өг-бүлелерниң кадыкшылынче онза кичээнгейни салган. Сентябрь 18-те Республиканың хөй-ниитиниң кадыкшыл болгаш эмчи профилактиказының төвүнге «Хөй ажы-төлдүг өг-бүлелерниң кадык камгалалынга комплекстиг деткимче» деп Ажык эжиктер хүнү болур. Ол-ла хүн республиканың кеш-шээр аарыглар диспансери консультацияларны болгаш профилактиктиг шинчилелдерни эрттирер. Сентябрь 19-та Тываның перинаталдыг төвүнге үш болгаш оон хөй ажы-төлдүг иелер комплекстиг скринингини эртип ап болур. Хөй ажы-төлдүг өг-бүлелерниң ажы-төлү республиканың уруглар эмнелгезинде уруглар шинчилгезин болгаш консультациязын эртер.
Байырлыг хемчеглерниң кол кезээ «Хөй ажы-төл — аас-кежик» деп өг-бүле фестивалы болур, аңаа консультация болгаш семинарлар шөлдери ажылдаар. Өг-бүлелер «Чаштарның чугаазы-биле» деп хөглүг оюнну, «Өг-бүлениң аас-кежииниң аялгалары» оюн-хөгжүмнүг ужуражылга, «Кезээде кады» өг-бүле квестизи база Алдан-Маадыр аттыг национал музейге делгелгелер болгаш темалыг экскурсияларны сонуургап көөрлер.
Байырлал үезинде ажы-төлүн кижизидип, республиканың хөгжүлдезинге үлүг-хуузун киирип чоруур ада-иелерге өөрүп четтиргенин илередир. Сентябрь 18–19 хүннеринде муниципалдыг тургузуглар болгаш ХБАБ-тың девискээр органнары хөй ажы-төлдүг өг-бүлелерге сертификаттарны тыпсып, үлегерлиг өг-бүлелерни онзалап демдеглээр езулалдарны эрттирер.
Уругларга болгаш аныяктарга аңгы программаны белеткээн. Өөредилге черлери хөй ажы-төлдүг өг-бүлелер-биле класс ужуражылгаларын, чурук мөөрейлерин, «Хөй ажы-төлдүг өг-бүле аймааның кадагалакчылары» деп номчулга мөөрейин эрттирер. Социал четкилерге «Чурукта хөй ажы-төлдүг өг-бүлениң чаңчылдары» деп чурук мөөрейи эртер, а библиотекалар өг-бүлениң үнелиг чүүлдеринге тураскааткан делгелгелерни бараалгадыр.
Ол ышкаш спортчу хемчеглер база планнаттынган. Өг-бүлелер эстафеталарга болгаш өг-бүле квестилеринге күжүн шенежир, сентябрь 19-та хөй ажы-төлдүг өг-бүлелер Советтиг Тываның 5 чылы аттыг стадионга ГТО шылгалдазын дужаап болур.
Өөредилге болгаш социал деткимче талазы-биле аңгы бөлүк ажылдаар. Ада-иелер хөй ажы-төлдүг өг-бүлелерде уругларның кадыкшылы, аарыгларны болдурбазы, чемненилге, кадык амыдырал дугайында лекциялар болгаш семинарларга киржир. Өг-бүлелерге социал деткимче, ажылга тургустунары болгаш өске-даа угланыышкыннарынга хамаарыштыр консультация шөлдери ажылдаар.
Байырлалдың хемчеглери сентябрьның 12-ден 20-ге чедир уламчылаар.