Дүүн Тываның Баштыңы «Сибирьниң генерация компаниязы» КХН-нуң составында республиканың эң улуг энергетика компаниязы – Кызылдың чылыдылга-энергетика төвүнге чораан. Владислав Ховалыг бүдүрүлгениң кышка белеткелиниң дугайында отчетту дыңнаан. Бүдүрүлгениң чиңгине директору Андрей Троцанның дыңнатканы-биле алырга, шупту ажылдар график езугаар чоруп турар болгаш, ам адакталып келген. Бо неделяның сан-чурагайлары-биле алырга, белеткел ажылдарының 88 хуузу доозулган.
Тываның Баштыңы МАХ-та бодунуң блогунда, Кызыл чоок-кавын чылыг болгаш изиг суг-биле хандырып турар ЧЭТ-ти эде чаартыр планнар дугайында сагындырган. Тываның найысылалының шапкын хөгжээн инфраструктуразының мурнунга тургустунуп келген чылыг энергиязының чедишпезин шиитпирлээри-биле, чугула херек курлавыр күчү-күжүн тургузар ужурлуг эде чаартылганы чорудар.
«Кызылда чаа чуртталга кварталдары база социал объектилер көвүдеп, шапкын туттунуп турар. «Арыг агаар» федералдыг төлевилел-биле, хуу секторда котельнаялар болгаш печка одаарындан үнүп, төп одалгаже чоорту кирерин планнап турар бис» - деп, ол бижээн.
Бо чылдың июньда Петербургтуң делегей чергелиг экономиктиг форумунга Владислав Ховалыг Сибирьниң генерация компаниязының удуртулгазы-биле ажылчын байдалда ужуражып, Кызылдың чылыг четки ажыл-агыйын хөгжүдер болгаш Кызылдың ЧЭТ-иниң чылыг күчүзүн улгаттырар айтырыгларны сайгарып көрген. Амгы үеде Сибирьниң генерация компаниязы чылыдылга төвүн эде чаартырының техниктиг-экономиктиг үндезинин ажылдап кылып турар. Тываның Баштыңы биле СГК-ның удуртулгазының ужуражылгазында, эде чаартылганың хемчээлин болгаш саң-хөө чарыгдалдарын тодарадыры-биле, Кызылдың чылыдылга четкилеринге долу техниктиг аудитти чорударын дугурушкан.
Тываның эрге-чагыргазы Кызылда агаарның хирлениишкинин эвээжедиринче угланган комплекстиг хемчеглер планын бадылаар кылдыр Россияның Бойдус яамызынче киирген. Ол ышкаш «Экологтуг чаагай чорук» национал төлевилелдиң «Арыг агаар» федералдыг төлевилели езугаар печка одаар хуу өрегелерни кадыг одаар чүүлче шилчидер хемчеглер планда кирген. Субсидияже киирген чагыгдан алырга, 2030 чылга чедир найысылалдың 3133 өрегелерин амгы үениң кадыг одаар чүүл котелдарынче шилчидери планнаттынган.
Тываның Баштыңы ЧЭТ-ке чорааш, бүдүрүлгениң коллективи-биле ужуражып, республиканың хөгжүлде планнары-биле таныштыргаш, ужуражылганың түңнелинде шылгараан ажылдакчыларга күрүне шаңналдарын тывыскан.
«Кызылдың ЧЭТ» акционерлиг ниитилелиниң бөлүк ажылчыннарынга энергетика болгаш чылыдылга адырында ак сеткилдиг ажылы болгаш бедик мергежили дээш, Тываның Баштыңының өөрүп четтириишкин бижиктерин тывыскан:
- бажыңнар болгаш тудуглар ажылдадыр цехтиң 4-кү разрядтың тудуг маляры Кама Опбей-ооловна Боликке;
- төпчүткен септелге цегиниң котел болгаш довурак-доозун белеткээр цехтерин септээр 6-гы разрядтың слесары Владимир Анатольевич Глазуринке;
- оперативтиг-диспетчер албанының диспетчери Азис Арсенович Мөңгеге;
- котел-турбина цегиниң V-ки бөлүүнде котел дериг-херекселдериниң улуг оператору Айнур Андреевич Суванга.
Энергетика болгаш чылыдылга адырында хөй чылдарда ак сеткилдиг ажылы дээш, Тываның Баштыңының Хүндүлел бижии-биле дараазында мурнакчыларны шаңнаан:
- бажыңнар болгаш тудуглар ажылдадыр цехтиң начальниги Денис Александрович Доможаков, чылыг четкизиниң база чер адааның коммуникация цегиниң мастери Айдаш Айдысович Куулар, өйлеп-таарыштырар чурум албанының начальниги Игорь Викторович Михайлов.
Чылыг-энергетика комплекизиниң хөгжүлдезинге киирген үлүг-хуузу болгаш хөй чылдарда ак сеткилдиг ажылы дээш «Тыва Республиканың алдарлыг энергетиги» хүндүлүг аттарны котел-турбина цегиниң 4-кү класстың котёл арыглакчызы Евгений Владимирович Давыдовка база ЧЭТ-тиң чиңгине директору Андрей Анатольевич Троцанга тывыскан.
Тываның Баштыңы Владислав Ховалыг шаңналдарны тыпсып тура, чылыг-энергетика төвүнүң ажылдакчы бүрүзүнге мергежилинге бердингени дээш өөрүп четтиргенин илереткеш, чурттакчыларның бажыңнарында чылыг-чымчак, аянныг байдал оларның ажылындан хамааржыр дээрзин онзалап демдеглээн.