«Кадык амыдыралче орук» губернатор төлевилелиниң эмчилер бригадазы амгы үеде ыраккы Тере-Хөл кожуунда ажылдап турар. Эмчилер сентябрь 8-тен 10-га чедир үш хонук ажылдаар. Бо губернатор эгелээшкини көдээ черлер чурттакчыларының аарыгларын эртежик илередип, эмнеп, катап тургузарын деткиир сорулгалыг. Республика Баштыңының Тыва Республиканың Дээди Хуралынга Айыткалының үезинде айыткан даалгалары езугаар 2025 чылда төлевилелди боттандырып эгелээн.
Төлевилел боттандырыыышкынын чорудуп турар Хөй-ниитиниң кадыкшыл төвү Тере-Хөл кожуунда отоларинголог, кардиолог, акушер-гинеколог, травматолог эмчилер чеде бергенин дыңнаткан. Кожууннуң чурттакчы чону көжүп чоруур комплексте ЭГДС база маммография аппараттарынга шинчилелдерни эртер. Көжүп чоруур бригаданың бирги ажыл хүнүнде 40 кижи комплекстиг шинчилгелерни эрткен.
Владислав Ховалыг республиканың бүгү чурттакчы чонунга профилактиктиг хыналдаларны чорударын Тываның Кадык камгалал яамызынга даасканын сагындыраал. Эмчилерге дуза кылдыр «Кадык амыдыралче орук» база «Уругнуң кадыынче орук» губернатор төлевилелдери-биле немелде хемчеглерни организастаан. Регионнуң Баштыңы тус черниң чурттакчыларын шинчилгелерже хөйү-биле хаара тударын, ылаңгыя шимчей албас болгаш назылап кыраан кижилерже онза кичээнгейни угландырарын кожуун чагырга даргаларындан негээн.
2025 чылда эмчилер «Кадык амыдыралче орук» губернатор төлевилели-биле республиканың 13 муниципалдыг кожууннарынче 50 үнүүшкүннү кылган. Чоннуң кадыкшыл байдалынга демдекти салып, аарыгларны эге чадазында илередир сорулга-биле 12533 эмчи шинчилгелерин чоруткан.