Сентябрь 9-тан 12-ге чедир В. Маяковский аттыг Норильскиниң полярлыг драма театры Кызылга оюн-көргүзүглерин бараалгадыр. 85 чылдаан коллектив төөгүзүнде Тывага бир дугаар кээп турары ол. «Өг-бүле» национал төлевилелиниң «Улуг гастрольдар» программазы-биле «РОСКОНЦЕРТ» федералдыг күрүнениң бюджет культура албан чери гастольдарны организастаан.
В. Көк-оол аттыг Тываның Национал хөгжүм-шии театрының сценазынга Норильскиниң полярлыг драма театры «Ак черниң дүштери», «Бөрүлер болгаш хойлар», «Каттырынчыг кижиниң дүжү», «Рикки-Тикки-Тави» деп дөрт шиини бараалгадыр. Янзы-бүрү жанрларлыг болгаш уран угланыышкыннарлыг шиилер аңгы-аңгы назы-харлыг көрүкчүлерни хаара тудар.
«Сөөлгү чылдарда репертуарывыстан чугула болгаш кол шиилерни көргүзүп турар бис. Ында бистиң режиссерларывыстың орус болгаш даштыкы классиканың амгы хевирин, бистиң артистеривистиң янзы-бүрү жанрлар болгаш стильдерде көргүскен хөй талалыг салым-чаяанын, а эң-не кол чүүл - бүгү салгалдарның көрүкчүлеринге амыдыралга ынакшылды, эки чүүлдерге болгаш кижилерниң күжүнге бүзүрелди көргүзер дээн дилээшкиннер бар» - деп, Норильскиниң полярлыг драма театрының режиссеру Ирина Куцая демдеглээн.
Республиканың культура сайыды Виктор Чигжит гастрольдар бүдүүзүнде, Норильск театрының удуртулгазы — директору Ирина Куцая, кол режиссеру Анна Бабанова, тургузукчу режиссеру Тимур Файрузов-биле ужурашкан. Ужуражылганың киржикчилери гастрольдарның программазын, организастыг айтырыгларны, регионнар аразында культурлуг кады ажылдажылганың келир үезин чугаалашкан. Тываның Культура яамызы биле Красноярск крайның Культура яамызының аразында 2024 чылда чарган кады ажылдажылга дугуржулгазының чугулазын ийи тала демдеглээн.
Гастрольдар тыва көрүкчүлерни Россияның эң соңгу чүгүнде театрларының бирээзиниң ажыл-ижи-биле таныштырар. Программа ылаңгыя школачыларга болгаш аныяктарга дыка ажыктыг, олар «Пушкин картазын» ажыглап шиилерни көрүп болур.