Тываның Культура яамызы Россияның Президентизи Владимир Путинниң инициативазы-биле 2025 чылда эгелээн «Көдээ культура ажылдакчызы» программага киржир мөөрейниң түңнелдерин үндүрген. Бо чылын комиссия программа негелделери-биле беш чыл дургузунда көдээ культура албан черлеринге ажылдаар болгаш чаңгыс катап 1 млн. рубль төлевирни алыр 27 тиилекчини шилээн.
Программаже билдириишкиннерни апрельде хүлээп эгелээн, а июльда доозулган. Комиссия кордакчыларның чогуур эртем-билиин, ажыл стажын, профессионал мөөрейлерге алган дипломнарын өөренип көрген. Культура ажылдакчыларының билдириишкиннерин сайгарып көргениниң соонда, Ак-Довурак хоорайда болгаш Тываның 12 кожууннарында уругларның уран чүүл школаларынче, районнуң культура бажыңнарынче, библиотекаларже ажылдадып чорудар.
Шилилдени эрткен беш тиилекчи Эрзин кожууннуң Д. Кежиктиг уругларның уран чүүл школазында күш-ажылчы хүлээлгелеринче кирген. Аныяк культура ажылдакчылары – П.И. Чайковский аттыг уран чүүл колледжизиниң (Улан-Удэ) доозукчузу, артист-хореограф Анна Шмит, А.Б. Чыргал-оол аттыг Кызылдың уран чүүл колледжиниң «артист», «башкы», «концертмейстер» мергежилдериниң доозукчулары Сайсана Ойдуп, Шииней Комбу, Бадымаа Түлүш, Евгения Монгуш олар Тыва Республиканың уран чүүлүнүң алдарлыг ажылдакчызы Аяна Сааяның (Монгуш) дагдыныышкыны-биле ажылдап эгелээн.
Эрзинниң уругларның уран чүүл школазының дыңнатканы-биле алырга, чаа ажылдакчыларның келгени-биле школада «Чинчилиг» деп чаа аас чогаал бөлүү тургустунган, школаның Нарын суурда салбырында тыва хөгжүм херекселдери — чадаган, бызаанчы, чаңзы талазы-биле чаа класстар ажыттынган. Чаа дооскан аныяк специалистер эртемнерни өөредир.
Тываның культура сайыды Виктор Чигжит көдээ чурттакчыларга программаның ажыктыын демдеглээн: «Көдээ культура ажылдакчызы» программа кожууннарда культураның деңнелин бүрүнү-биле өскертир арганы берип турар. Кадрлар шуптузун эвес-даа болза, дыка хөйнү шиитпирлээр. Эрткен чылын 13 көдээ культура ажылдакчылары кожууннарга ажылдап чеде бергеш, чогаадыкчы коллективтерни тургузуп азы катап оттуруп, клуб каттыжыышкыннарның киржикчилериниң санын көвүдедип, уругларның уран чүүл школаларында чаа өөредилге угланыышкыннарын ажыдып, ажылды көзүлдүр экижидипкен. Чаа «көдээ» ажылдакчылар бо шимчээшкинге немелде күштү бээринге бүзүрээр мен».