Бөгүн Кызылга Улусчу полктардан волонтерларның «Бүгү чүүлдү Тиилелге дээш!» деп регионалдыг шуулганы болуп турар. Бүгү Тывадан 400 ажыг киржикчилер арга-дуржулгазын үлежип, келир үеде ажыл-херектерин сайгарып, тускай шериг операциязының зоназында шериг албанныгларга болгаш оларның өг-бүлелеринге хүн бүрүде дузаны чедирип турар кижилерге өөрүп четтиргенин илередир дээш чыглып келгеннер.
Тываның чурттакчылары тускай шериг операциязының баштайгы хүннеринден эгелээш, чаңгыс чер чурттугларын деткиир дээш демнешкеннер. Бөгүнде Улусчу фронтунуң «Улусчу полктар» төлевилели-биле республиканың шупту муниципалдыг тургузугларында 120 волонтер пунктулары ажылдап турар.
«Республиканың шупту волонтер төптериниң делгелгезин көрдүм. Бистиң идепкейжилеривистиң аргаан чылыг хептери, школачыларның бижээн чагаалары, сагыш човаачал чурттакчыларның өрээн камуфляж четкилери кижиниң сагыш-сеткилинге дээп кээр-дир. Шериг кижи бүрүзүнүң артында дыка улуг деткимче бары билдингир. 2020 чылдан бээр тускай шериг операциязының зоназынче Тывадан 560 тонна гуманитарлыг чүъктү база 268 санныг транспортту чоруткан. Ол дуза чедирилгезин албан уламчылаар бис» - деп, Тываның Баштыңы Владислав Ховалыг чугаалаан.
Волонтерлар төптери бүдүн чыл дургузунда ажылдап турар. Шериг албанныгларның сезоннуг хереглелдериниң аайы-биле чыылдаларны организастаан: кыжын Шагаага, часкы үеде май 9-ка, а чайгы үеде күскү-кышкы үеге белеткенир дээш. Чүък Донецк болгаш Луганск Улус Республикаларда, Запорожье биле Херсон областарда база Курск биле Белгород областарда чедип турар. Дараазында күскү чыылда сентябрьда эгелээр, а чүъктү октябрь төнчүзүнде чедирер деп планнаан.
Херек дузаламчының хөй кезиин волонтерлар боттарының холу-биле кылып турар. Олар ажылдап эгелээнден бээр тускай шериг операциязының зоназынче 3817 камуфляж четкилерни болгаш "Панцир" камгалал шывыгларны, 1333 чеңи-чоктарны, 774 чылыг курларны, 926 шоодайларны, тепловизордан камгалаар 1298 чылыг чоорганнарны, 1045 ылгавыр демдектерни, 4190 арынга маскалар болгаш шлем адаанга кедер бөрттерни белеткеп чорутканын, Улусчу фронтунуң Тывада регион салбыры дыңнаткан.
Шуулган үезинде волонтерлар бот-боттарының ажылдары-биле таныжып, мастер-класстарга киржип, гуманитарлыг дузаны чыыр, шыгжаар болгаш чедирер талазы-биле консультацияларны алган. Тускай шериг операциязының киржикчилериниң өг-бүлелерин деткииринче онза кичээнгейни салган.
Тускай шериг операциязының киржикчилерин деткииринге улуг үлүг-хуузун киирген шериг албанныгларга болгаш идепкейжилерге шуулган үезинде шаңналдарны тывыскан. Гвардияның лейтенантызы Найыр Кууларны «Эрес-дидим чорук дээш» медаль-биле шаңнаан. Республиканың волонтерлар пунктуларының база каттыжыышкыннарының удуртукчуларынга болгаш координаторларынга Тываның Баштыңының Өөрүп четтириишкин бижиктерин тывыскан. Кызыл хоорайда «Энерел сеткилдиң отчугажы» база «Дүрген суурнуң херээженнер чөвүлели» волонтер төптериниң удуртукчуларын Тываның Баштыңының Хүндүлел бижиктери-биле демдеглээн.
Республиканың шупту кожууннарынга, ол ышкаш Кызыл биле Ак-Довурак хоорайларга эрткен муниципалдыг ужуражылгаларның уламчызы – «Бүгү чүүлдү Тиилелге дээш!» шуулган болган.
Дайынчыларга болгаш оларның өг-бүлелеринге доктаамал болгаш чедимчелиг ачы-дузаны чедирер дээш волонтерларның, эрге-чагырга органнарының болгаш хөй-ниити организацияларының күжениишкиннерин каттыштырары – оларның кол сорулгазы.
«Бо берге болгаш чугула күш-ажыл дээш волонтер бүрүзүнге четтирдивис. Силерниң сагыш човаашкыныңар бистиң дайынчыларывыска дыка херек» - деп, Владислав Ховалыг демдеглээн.