Тыва Республиканың Чазааның хуралында, «Хойжу» төлевилелди республика Баштыңы Владислав Ховалыг даргалааны сайыттар кабинединге бирги номчулгазын сайгаргаш, чедир ажылдаар кылдыр дедир эгиткен. Көдээ ажыл-агый бүдүрүлгезин хөгжүдер күзелдиг кижилерге дузаламчы хемчеглерин тургузары эгелээшкинниң кол сорулгазы ол деп, республика Баштыңы демдеглээн.
Владислав Ховалыг программаны боттандырарының кол негелделерин болгаш планнаттынган сорулгаларын тодараткан: «Төлевилел хой болгаш өшкү мал өстүрүп көвүдедип чоруур фермерлерге деткимчени көргүзер. Амгы үеде хой болгаш өшкү малдап чоруур ажыл-агыйларга грантыга 300 баш хойну берип, чыл санында 18 киржикчини хаара тудар план бар. Фермер бизнезин хөгжүдер фонд таварыштыр амгы араттар ажыл-агыйын калбартыр аргалыг: чылдың-на 450 баштан тургустунган 26 кодан хевирлеттинер. ИПСЭР улуг бүдүрүлгелерге чылдың-на 700 хире баш хойлуг чеди мал ажыл-агый комплекизин тургузар ужурлуг».
Республиканың Баштыңының даалгазы-биле Тываның Көдээ ажыл-агый болгаш аъш-чем яамызы төлевилелди ажылдап кылган. Ол хой болгаш өшкү азырап көвүдедип чоруур малчыннарга күрүне деткимчезиниң хемчеглери-биле мал ажыл-агый адырының экономиктиг үре-түңнелин бедидер сорулгалыг.
«Наадым-2026» малчыннар байырлалының үезинде төлевилелди таныштырган. Бүгү республикадан ат-сураглыг, билдингир малчыннар ооң сайгарылгазынга киришкен.
Мал ажыл-агыйының хоочуннары болгаш мурнакчылары сайгарылга үезинде төлевилелдиң ажыктыын болгаш чогуур үезинде эгелээр деп турарын демдеглеп, аңаа киржириниң негелделеринге хамаарыштыр санал-оналдарын кииргеннер. Программаны ам-даа чедир кылырынга адырның төлээлериниң санал-оналдарын кичээнгейге алган.
Чазак хуралының үезинде сайыттар кабинединиң кежигүннери төлевилелди боттандырарының арга-хевирлеринге хамаарыштыр элээн каш тодарадыр айтырыгларны салган. Түңнелинде, киржикчилерни шилип алырының негелделеринге болгаш оларның аразынга курлавырларны хуваарының чурумунга хамаарыштыр деткимче хемчеглерин чедир ажылдап, тодарадыр кылдыр төлевилелди бирги номчулгага бадылаар деп шиитпирни хүлээп алган.
Уксаалыг мал ажыл-агыйының инфраструктуразын хөгжүдери – Тываның Көдээ ажыл-агый болгаш аъш-чем яамызының мурнады боттандырар сорулгаларының бирээзи деп, Владислав Ховалыг 2026 чылда ТР-ның Дээди Хуралынга Айыткалында ведомствога айыткан.