Тыва эвээш орулгалыг, хөй ажы-төлдүг өг-бүлелерниң бажыңнарынга өрттерни болдурбазы-биле, 2018 чылдан бээр автономнуг ыш медээчилерин тургузуп турар. Чеди чыл дургузунда 4300 ажыг ындыг херекселдерни салган. Регионнуң Күш-ажыл болгаш социал политика яамызының дыңнатканы-биле алырга, бо чылын 2151 датчикти салыры планнаттынган. Республиканың Баштыңы Владислав Ховалыг неделяның аппарат хуралында, печка одаар бажыңнарда чурттап турар өг-бүлелерге өртке удур айыыл чок чоруктуң профилактика хемчеглерни күштелдирериниң чугулазын онзалап демдеглээн.
Автономнуг ыш сигнализациязы дээрге, өрээлде бичии-ле ышты дораан илередип, ыыткыр медээни бериптер херексел-дир. Ол чүүл кижилерге дүрген оттуп, айыылдыг черден үнеринге дузалаар. Тываның хамааты камгалал болгаш онза байдалдар албаны квартира азы бажың бүрүзүнге ындыг медээчини тургузары – кижиниң амы-тынын камгалаарының дээштиг аргазы деп санап турар.
Күш-ажыл яамызының дыңнатканы-биле алырга, сентябрь 3-ке чедир муниципалдыг тургузугларда өг-бүлеге болгаш уругларга социал дуза төптеринче 1641 автономнуг өрт медээчилерин үлээн, а арткан 420 херекселди удавас дамчыдар. Ук төптер тускай учетта өг-бүлелерге дериг-херекселдерни үлеп, бажыңнарынга салыр.
Кызылдың мэриязының дыңнатканы-биле алырга, 2026 чылдың эгезинден бээр хоорайга 100 автономнуг өрт медээчилерни – 89 хуу бажыңнарда, 11 хөй квартиралыг бажыңнарда база малчын турлагларда салган.
Россияның Онза байдалдар яамызының Тыва Республикада кол эргелелиниң дыңнатканы-биле алырга, чыл эгезинден бээр регионга 757 бажың өрттери болган, аңаа 5 кижи амы-тынындан чарылган, 44 кижи кемдээн. 23 уруг өрттеңнерни алган. Кол эргелел өртке удур айыыл чок чоруктуң дүрүмнерин шыңгыы сагыырынче, үрелген электри херекселдерин ажыглавайн, квартираларында болгаш бажыңнарында электри четкизин ажаап-карактаарынче хамаатыларны кыйгырган. Ада-иелер ажы-төлүнүң айыыл чок чоруу дээш харыысалгалыг дээрзин өртке удур камгалал инспекторлары сагындырган. Уругларга өртке удур айыыл чок чоруктуң дүрүмнерин өөредип, чүгле улуг улус бар турда электри херекселдерин ажыглаарын тайылбырлаары чугула. Уруглар дүрген дузаның 112 дугаарын билир боор ужурлуг.