Дүүн Россияга Саң-хөө ажылдакчызының хүнүн демдеглээн. Республиканың Баштыңы Владислав Ховалыг саң-хөө адырының хоочуннарынга болгаш специалистеринге профессионал хүнү-биле байырны социал четкилер таварыштыр чедирген. Тываның Баштыңы коллектив-биле ужуражылга үезинде Федералдыг казначействонуң Тыва Республикада эргелелиниң ажылдакчыларынга байырны чедирген.
Владислав Ховалыг регионнуң социал-экономиктиг хөгжүлдезинге саң-хөө системазының чугула ролюн байыр чедириишкининде демдеглээн: «Акша-хөреңгиниң шын башкарылгазы, банк адырының хөгжүлдези, инвестиция болгаш бизнести деткиири регионга бүзүрелдиг бурунгаарлаар арганы берип турар. Чаңгыс чер чурттугларывыстың амыдырал-чуртталгазының шынары саң-хөө адырының ажылдакчыларының чиге, харыысалгалыг болгаш стратегтиг боданып билиринден дорт хамааржыр» - деп, ол бижээн.
Владислав Ховалыг регионалдыг казначейство эргелелиниң ажылдакчылары-биле ужуражылга үезинде, бюджеттиң ажык-чарлыг чоруун хандырып, рубль бүрүзүн тодаргай сорулгаларга шын чарыгдаарын хандырып турар ынаныштыг болгаш профессионал чоруу дээш специалистерге өөрүп четтиргенин илереткен.
Республика Баштыңы тускай шериг операциязының киржикчилерин деткиир ажыл-херекке коллективтиң улуг үлүг-хуузун демдеглээн. Коллектив шериг албанныгларның дилээ-биле гуманитарлыг дуза чыырынга идепкейлиг киржип турар. Тускай шериг операциязының зоназынче мотоциклдер, генераторлар, чылыг пушкалары, дроннар, радиостанциялар болгаш радиоэлектроннуг демисел дериг-херекселдер дээн ышкаш, чугула техника дериг-херекселдерни доктаамал чорудуп турар.
Эргелелдиң удуртукчузу Солангы Саая ведомствонуң ажыл-чорудулгазының кол көргүзүглерин таныштырып, республиканың чазаа-биле чедимчелиг кады ажылдажылга тургустунганындан, Тыва чуртта эң-не идепкейлиг он регионнуң аразында мурнакчы турушту ээлеп турарын илеткээн.
«Казначействонуң төлевирлер, учет болгаш садып алыышкыннар дээш, шупту айтырыгларын амгы үениң дериг-херекселдерин база сан-чурагай аргазын ажыглап шиитпирлеп турар. Федералдыг казначействонуң тургусканы чаңгыс аай бюджет платформазы шупту деңнелдерниң бюджеттерин чаңгыс системада каттыштырган. Бо чылын республикада шупту бюджет болгаш автономнуг албан черлерин ол платформаже шилчиткен, а 2027 чылда республика болгаш муниципалдыг казна албан черлериниң шуптузун шилчидери планнаттынган. Бо платформа федерациядан субъектиге чедир, субъектиден муниципалитеттерге чедир — бүгү система таварыштыр төлевирлерни үзүктел чокка шилчидип, документилер чорударының айыыл чок чоруун хандырар» - деп, Солангы Саая чугаалаан.
Владислав Ховалыг Тываның чаагай чоруу дээш казначействонуң регионалдыг эрге-чагырга-биле үре-түңнелдиг кады ажылдажылгазын оон-даа уламчылаарынга бүзүрелин илередип, эргелелдиң ажылдакчыларынга кадыкшылды, чедиишкиннерни, чаа-чаа чедиишкиннерни күзээн.
Дараазында ажылдакчылар саң-хөө адырында ак сеткилдиг төлептиг ажылы дээш Тываның Баштыңының Өөрүп четтириишкинин алганнар:
- Хемер-оол Дан-Хаяа Мергеновна – Федералдыг казначействонуң Тыва Республикада эргелелиниң иштики контроль болгаш аудит килдизиниң начальниги;
- Биче-оол Оюмаа Хунай-ооловна – Федералдыг казначействонуң Тыва Республикада эргелелиниң №12 килдизиниң начальниги.
Саң-хөө адырынга хөй чылдарда ак сеткилдиг ажылы дээш «Тыва Республиканың алдарлыг ажылдакчызы» хүндүлүг атты «Россияның казначействозунуң Новосибирск хоорайда ажыл-чорудулгазын хандырар төвү» федералдыг казна албан чериниң регионнар аразының № 8 филиалының (Кызыл) килдис эксперти Базан Валентина Маадыр-ооловнага тывыскан.