.jpg)
Россияның Президентиниң чарлыы-биле бөгүн Россияның чоннарының дылдар хүнүн бир дугаар демдеглеп турар. Республиканың Баштыңы Владислав Ховалыг Тывага хамаарыштыр алырга, ол чүгле чугаалажырының аргазы эвес, а салгалдар аразында дириг харылзааның, чоннуң бот-тускайлаңының болгаш сүлде-сүзүүнүң байлааның үндезини болур байырлалдың онзагай ужур-утказын демдеглээн.
Владислав Ховалыг тыва дылды камгалаар болгаш делгемчидер талазы-биле республиканың эрге-чагыргазы системалыг ажылды чорудуп турарын демдеглээн: «Дыл политиказының талазы-биле күрүне чөвүлели кол рольду ойнап турар, а бистиң бадылаанывыс 2033 чылга чедир тыва дылды күрүнеден деткиириниң болгаш хөгжүдериниң стратегиязы ол шимчээшкинниң сорулгазы апарган. Ол бистиң лингвистиктиг өнчү-салгалывысты камгалап кадагалаарынга үр хуусаалдыг үндезин-дир».
Республика Баштыңы башкыларга, эртемденнерге, культура ажылдакчыларынга, журналистерге тыва дылдың чаагай чоруу дээш ажылынга өөрүп четтиргенин илереткен: «Силерниң ажылыңар – бистиң республикавыстың келир үезинче улуг салыышкын-дыр» - деп, айыткан.
Россияның чоннарының дылдар хүнү улуг шүлүкчү Расул Гамзатовтуң төрүттүнген хүнүнге тураскааттынган эртип турар. Байырлал хүнүнде «Россия – чоннарның бажыңы» деп бүгү-российжи диктантыны бижээн. Дагестанның болгаш хөй националдыг литератураның демдээниң бирээзи болу берген көскү авар шүлүкчүнүң чогаалдарындан үзүндүлер диктантының сөзүглелинде кирген. Сөзүглелди авар дылдан диктант бижииринге таарыштыр очулдурган.
Диктантыны бижиирде РУВИКИ онлайн-энциклопедияның сайтызында dictant.ruwiki.ru айтыгга онлайн киржип болур. Диктантыга кандыг-даа кижи киржип болур.
Кызылда К.Б. Ондар аттыг Тыва үндезин культура болгаш ус-шеверлер хөгжүдер төпте диктант бижиир шөлдү тускайлаан.
2026 чылда диктантының темазы – Россияның чоннарының чаңгыс деминиң чылынга тураскааткан. Интернет-энциклопедияның тускайлааны: орус, алтай, башкир, бурят, вепс, даг мари, ингуш, калмык, карел, коми, коми-пермяк, хову мари, мокша, эрзя, татар, тыва, удмурт, хакас, чечен, чуваш болгаш якут дээш, 21 дылдарда диктантының сөзүглели бар.