Тываның Баштыңы Ак-Довуракка ажылчын сургакчылаашкын үезинде 2 биле 3 дугаар школаларга четкен. «Аныяктар болгаш уруглар» национал төлевилелдиң «Уругларга бүгү-ле экини» федералдыг программазы-биле бо чылдың эгезинде 3 дугаар школада эгелээн септелге ажылдары доозулган. Ынчалза-даа 2 дугаар школага чартылга негеттинип турар. Владислав Ховалыг ниити өөредилге албан черлерин хынаан соонда, Ак-Довурактың школачыларынга өөренер болгаш сайзыраар байдалдарны экижидеринче угланган элээн каш даалгаларны берген.
2 дугаар школаның директору Игорь Булавко 2020 чылда школаның бирги каъдының улуг септелгези доозулганын, ам тудугнуң ийиги каъдынга септелге негеттинип турарын дыңнаткан. Чамдык ханаларны, шалазын болгаш инженер четкилерин солууру база иштики шеверлел ажылдарын кылыры бар.
Владислав Ховалыг школаның иштики өрээлдерин болгаш девискээрин эргий кезээн соонда, школаны өөредилге объектилерин чаартыр федералдыг программаже киирерин аргазын өөренип көөрүн ведомстоларның удуртукчуларынга болгаш кожуун чагыргазынга дааскан. Оон аңгыда школа чанында хос девискээрге күш-культура кичээлдеринге спорт залды тударын планнаан.
«Тудугнуң бодун тударындан аңгыда, ону долгандыр шупту херек инфраструктураны тургузары чугула. Ол төлевилелди боттандырарының шупту аргаларын шинчилеп көөрүн чогуур албан-дужаалдыг кижилерге даастым» - деп, Владислав Ховалыг 2 дугаар школага чораан соонда бодунуң блогунда демдеглээн.
3 дугаар школага капитал септелге үезинде даштын, класстарны болгаш спортзалды чаарткан. Владислав Ховалыг школа иштинде эки өскерлиишкиннерни демдеглеп тура, ооң даштында шөлче кичээнгйени угландырган. Ында четпестерни дарый чайладыр даалганы хоорай чагыргазы-биле школаның удуртулгазынга берген.
«Уруглар аянныг болгаш айыыл чок байдалга өзүп, сайзырап, салым-чаяанын ажытсын дээш Тываның өзүп орар салгалынга эң-не таарымчалыг байдалдарны тургузары – бистиң дорт хүлээлгевис» - деп, республика Баштыңы демдеглээн.
Амгы үеде Ак-Довурактың 2 дугаар школазында 200 уруг, а чаарттынган 3 дугаар школада 700 хире кижи өөренип турар. Өөредилге чериниң 40 чыл ажылдаан төөгүзүнде 3 дугаар школада бир дугаар улуг септелгени кылган. Дөрт каът школаның крышазын, иштики шеверлелин, инженер четкилерин, соңгаларын болгаш эжиктерин чаартып, өске-даа ажылдарны кылган.