Кузбасстың эмчи колледжизиниң Анжеро-Суженск филиалының Тывадан сургуулунуң киржилгези-биле болган онза болуушкун понедельникте билдинген, ынчалза-даа ол эрткен пятницада болганын өөредилге албан чери дыңнаткан. Тыва чурттуг назы четпээн оолду өөренип турары колледж чанында паркка эттеп каапкан. Ол болуушкунну тырттырып алгаш, понедельникте интернетче үндүр салган соонда, ол социал четкилерде тарай берген.
Ооң түңнелинде Тывадан аныяк оолду эмнелгеге чыттырган бо коргунчуг болуушкунну сайгарарын республика Баштыңы Владислав Ховалыг негээн. Тыва Республиканың иштики херектер яамызы Россияның ИХЯ-зының Кемерово область талазы-биле кол эргелелден коллегалары-биле кады болуушкунну истеп турар. Хоойлу-дүрүм камгалаар органнар ажылдакчыларында шупту херек бадыткалдар – эттеп турарының видео-бижидилгези оларның холунда бар.
Тыва Республиканың Чазааның Даргазының оралакчызының хүлээлгезин күүседип турар база өөредилге сайыды Алексей Сазан-оол когараан оолдуң ада-иези-биле харылзашкан, олар Кемерово областьче чорупкан, болуушкуннуң байдалын болгаш моон соңгаар кандыг базымнарны кылырын чугаалашкан.
«Бир эвес элээди оолдуң болгаш ооң ада-иезиниң күзели бар болза, ону Тывада Республиканың эмчи колледжизинче шилчидеринге дузалажып, бүгү-ле чугула деткимчени көргүзер бис. Республикадан элээди оолдуң база өске-даа 30 хире сургуулдар өөренип турар Кузбасстың эмчи колледжизиниң Анжеро-Суженск салбырының удуртулгазы-биле база чугаалаштым. Өөредилге албан чери болуушкунга хамаарыштыр сургуулдар-биле ажылды чорудар болган» – деп, Алексей Сазан-оол ВКонтакте социал четкиде бодунуң блогунда бижээн.
Бистиң республикадан студентилер өөренип турар чоок-кавы регионнарга шак ындыг таварылгаларны болдурбас хемчеглерни алыр дээш, Тывада ведомстволар аразының комиссиязы тургустунганын Сазан-оол дыңнаткан. Комиссия тус черлерде өөредилге черлериниң удуртулгазы болгаш эрге-хоойлу камгалаар органнары, ол ышкаш студентилерниң боттары-биле кады профилактиктиг ажылды чорударын планнап турар.
«Ындыг онза болуушкуннар катаптаттынмазын дээш, шупту хемчеглерни алыр бис» - деп, ол түңнээн.
Россияның ИХЯ-зының Анжеро-Суженск хоорай округунуң килдис ажылдакчылары, Россияның Кемерово облазы – Кузбасстың истелге комитединиң истекчилери-биле кады ол болуушкуннуң херечилерин болгаш киржикчилерин тодараткан. Халдаашкын кылган назы четпээннерниң ада-иелерин база ону тырттырып турган уругну РФ-тиң Административтиг кем-херек үүлгедиишкиннериниң дугайында хоойлунуң «Ада-ие азы өске-даа хоойлу езугаар төлээлериниң назы четпээннерни ажаап-карактаар база кижизидер хүлээлгелерин күүсетпээни дээш» деп чүүлү-биле харыысалгага онааган.
Россияның Кемерово область – Кузбасстың истелге комитединиң девискээр истелге килдизи бо болуушкунга хамаарыштыр РФ-тиң Кеземче хоойлузунуң «Хулиган чорук» деп 213 чүүлү езугаар истелгени база эгелээн. Истекчи болуушкуннуң шупту байдалдарын тодарадыр дээш, элээн каш хыналда хемчеглерни чорудуп турар. Ооң түңнелдеринге даянып, эрге-хоойлу шиитпирин хүлээп алыр.