Тываның Баштыңы барыын кожууннарга ажылдап чорааш, «Аныяктар болгаш уруглар» национал төлевилелдиң «Профессионалитет» федеральдыг программа-биле капитал септелге чоруп турар Ак-Довурактың даг техникумунуң өөренир черин хынаан. Владислав Ховалыг септелге ажылдарын көрүп, өөредилге черинге чугула херек өөренир дериг-херекселдер садып берип турар инвестор – компании «Ареал» компанияның үлүг-хуузун демдеглээн.
Доозукчуларның ажылчын олуттарга чаңчыгар хуузун кызырганындан экномиканың боттуг негелдезинге дүгжүп турар мергежилдиг кадрларны белеткээр сорулгалыг «Профессионалитет» деп федералдыг төлевилелде Тыва Республика идепкейлиг киржип турар. Тываның агроүлетпүр техникумунуң чанынга тургустунган көдээ ажыл-агый кластери 2023 чылдан бээр федералдыг эгелээшкинниң деткимчези-биле республикада чедиишкинниг ажылдап турар. 2025 чылдың сентябрь 1-де ийи угланыышкын — даг-болбаазырадылга болгаш тудуг талазы-биле ажылдап эгелээн. Ак-Довурактың даг техникуму даг-тывыш кластерин хөгжүдер шөл болуп турар.
Республиканың бүдүрүлгелери төлевилелге катчып, өөредилге черлери-биле кады ажылдажылга дугуржулгазын чарган. Даг-тывыш адырында кол партнерлар аразында «Тардан Голд» КХН, «Лунсин» КХН, «Тываның даг-руда компаниязы» КХН, «Перспективтиг өдүг-технологиялар» КХН, «Эльбрус Металл» КХН бүдүрүлгелер бар. Ак-Довурактың техникуму «Ареал» компания-биле кады ажылдап турар. Даг-тывыш бүдүрүлгези студентилерниң практиктиг кичээлдеринге ажыглаары өөредилге дериг-херекселдерин өөредилге черинге садып берип турар.
«Ареал» компанияның ролюн демдеглексеп тур мен. Инвестор келир үениң специалистеринче акша-хөреңгини киирип, өөредилге черинге техниканы садып берип, ол ышкаш техникумга дуңзаалаар шөл тудуун акшаландырарынга белен. Компания сургуулдарны чүгле ажылче хаара тудуп турар эвес, а стипендия-биле база деткип турар» - деп, Владислав Ховалыг техникумнуң студентилери-биле ужуражылгазының соонда чугаалаан.
Владислав Ховалыг сургуулдар республикага херек мергежилдерни – машинист, ажыктыг казымалдар болбаазырадыкчылары дээш, оон-даа өске мергежилдерни шилип алганын демдеглээш, оларның өөредилгезинге чедиишкиннерни күзээн.
Ак-Довурактың даг техникуму дараазында угланыышкыннарда специалистерни белеткеп турар: «Электри болгаш электромеханиктиг дериг-херекселдерни ажыглаары болгаш хандырылгазы (адырлар аайы-биле)», «Ажык даг ажылдары», «Ажыктыг казымалдар чыдынын чер адаанга казып тывары», «Ажыктыг казымалдар болбаазырадылгазы», «Информастыг системалар болгаш курлавырлар оператору», а ол ышкаш «Дуңзаакчы (хол-биле болгаш чамдыкта механизациялыг дуңзаа», «Ажык даг ажылдарының машинизи», «Даг-руда дериг-херекселдериниң септекчизи» база «Ажыктыг казымалдар болбаазырадыкчызы» деп мергежилдерге өөредип турар.