Киргизияга 100 ажыг чурттардан спортчуларның киржилгези-биле көшкүн чоннарның VI дугаар бүгү-делегей оюннары доозулган. Россияның чыынды командазының составында Тыва Республиканың 27 төлээзи алдын, мөңгүн, хүлер медальдарны Россия Федерациязының командазынга чаалап эккеп, ол ышкаш чогаадыкчы мөөрейлерге шаңналдыг черлерни ээлээн. Тываның Баштыңы Владислав Ховалыг тыва спорттуң болгаш культураның мастерлеринге чедиишкиннерлиг киришкени дээш байырны чедирип, чаңгыс чер чурттугларының бедик деңнелинге чоргааралын илереткен.
«Көшкүн чоннарның күчүтен мөгези» деп хүреш – маргылдааларның кол болуушкуну болган. Сөөлгү салыгда Айдын Монгуш бодунуң сүр-күчүзүн база катап бадыткап, эң күштүг мөге деп адын камгалап, тулган чемпион болган. Сүлде Донгак база чедиишкинниг хүрежип, сумога алдын медальды чаалап алган. Мөңге-Эртине моол хүрешке мөңгүн медальды, а Сайын-Белек Тюлюш сумога хүлер медальды алган.
Культурлуг делегациявыска канчаар-даа аажок чоргаарланыр-дыр бис. «Көчмөндөр санаты» фестивальга тыва хөөмей көрүкчүлерниң чүрээн чаалап алган: Далай Дамдын Гран-прини чаалап эккелген болза, Игорь Көшкендей биле Айдаш Барынмаа бистиң чонувустуң онзагай өнчүзүн бедик деңнелге деңнелге бараалгаткан. «Азас» танцы-сам ансамбли «Этно-танцы» деп делегей чергелиг мөөрейге чайынналчак чедиишкинни чедип чаалап алган» - деп, Тываның Баштыңы бодунуң блогунда дыңнаткан.
Тыва спортчулар маргылдааларга бедик мергежилин көргүскенин демдеглээри чугула. Сүлде Донгак шупту салыгларны бүзүрелдиг ажып, удурланыкчыларын чаңгыс-даа аштырыышкын чокка тиилээш, финалче үнген. Шиитпирлиг сөөлгү салыгда Кыргызстандан спортчу – Бактияр Мирлан уулуга ойнадыпкан.
«Көшкүн чоннарның күчүтен мөгези» деп аттың эдилекчизи Айдын Монгуш биле Бактияр Мирлан уулу эң сөөлгү салыгже үнгеннер. Тулган чемпион ат дээш эң сөөлгү салыгда Айдын Монгуш бодунуң артык күштүүн бүзүрелдиг шынзыдып, эң күштүг мөге деп адын база катап бадыткаан.
Айдын Монгуш 2018 чылда бүгү-делегейниң көшкүн чоннарының III оюннарының үезинде, моол, сумо хүрештерге тиилээш, база хүрештерниң 13 хевирлеринге маргылдааларның тиилекчилер аразынга тулган мөге ат дээш хүрешкеш, «Көшкүн чоннарның күчүтен мөгези» атты бир дугаар чаалап алганын сагындыраал.