«Сорунза» губернатор төлевилели-биле Сайлыг суурда көдээ культура бажыңын тудуп турар. Тываның Баштыңы Чеди-Хөл кожуунче үнүүшкүннүг хыналда үезинде тудуг шөлүнге чораан. Владислав Ховалыг хыналда соонда, темпини суларатпайн, тудугну үезинде доозар даалганы ажылчыннарга берген.
2021 чылдан эгелээн «Сорунза» төлевилели эргижирээн болгаш аварийлиг байдалда келген оран-саваларда көдээ культура бажыңнарының санын эвээжедир сорулгалыг боттандырып турар. Бо чылын республика баштыңының эгелээшкини-биле эрги тудугларны катап эде тударының орнунга, оларны бускаш, ол-ла чер участогунга чаа тудугларны тудар деп шиитпир хүлээп алдынган. Тываның Культура яамызы төлевилелдиң боттаныышкынын удуртуп турар.
«Объектиниң ниити техниктиг белеткели амгы үеде 40 хире хуу. Тудугжулар тудугнуң таваан куткаш, ооргаларын салгаш, кара шалазын дооскан, ол ышкаш кудукту хаккан. Бо хонуктарда чер шимчээшкининге удур куржагны эптеп, арматурадан каркасты кылган. Объектини график езугаар доозар дээш, темпини кошкатпайн ажылдаарын чагыдым» - деп, Владислав Ховалыг объектини хынаан соонда бодунуң блогунда бижээн.
Бо чылын губернатор инициативазы-биле Кызыл кожууннуң Ээрбек, Улуг-Хем кожууннуң Арыг-Үзүү, Чеди-Хөл кожууннуң Сайлыг, Бай-Тайга кожууннуң Тээли суурларда дөрт чаа культура бажыңнары туттунуп турар. Сайлыг биле Арыг-Үзүү суурларда культура бажыңнары чаңгыс төлевилел-биле туттунган: 120 олуттуг көрүкчү залдыг, 56 дөрбелчин метр шөлдүг библиотекалыг.
Республика бюджединиң акшаландырыышкыны-биле чаа көдээ культура одагларын амгы үениң дериг-херекселдери, мебель болгаш оргтехника-биле чепсеглээр.
Чаа клуб суур чурттакчыларының, ылаңгыя бичии уруглар болгаш аныяктарның чогаадыкчы чоруун ажыдып, байырлалдар болгаш дыштанылгазын чылыг болгаш эптиг байдалга организастаар арганы бээр деп Владислав Ховалыг демдеглээн.
2021 чылда губернатор төлевилелин боттандырып эгелээн үеден бээр бүдүн республикада 16 көдээ клубтарны чаартып, туткан. «Чаңгыс демниг Россия» партияның Улусчу программазын тургузар дээн чон чыыштарының үезинде, суурлар чурттакчыларындан кирген дилеглерге даянып, культура бажыңнарын чаартыр суурларны шилип ап турар.