Тываның Баштыңы Тургузукчу күш-ажылдың болгаш өг-бүле ыдыктарның чылында аңгы-аңгы адырларның колективтери-биле ужуражылгаларны доктаамал эрттирип турар. Бо хонуктарда Владислав Ховалыг республиканың 1 дугаар эмнелгезинге эмчилер ниитилежилгелериниң төлээлери-биле ужурашкан. Республика Баштыңы эмнелге албан черлерин төлээлээн кол эмчилер-биле ужуражып тура, оларның ажылынга үнелелди берген:
«Сөөлгү чылдарда бистиң кадык камгалал системавыс эки түңнелдерни чедип алган. Национал төлевилелдерниң ачызында бирги эмчи звенозун бүрүнү-биле эде чаартынган: эмнелге албан черлерин тудуп, автопаркты чаартып, кожууннарны амгы үениң дериг-херекселдери-биле хандырып турар бис. Чазак Даргазы Михаил Владимирович Мишустин болгаш кадык камгалал сайыды Михаил Альбертков Альберт Кызылга чоокта чаа кээп чорааш, адырга бедик демдекти берген» - деп, Владислав Ховалыг демдеглээн.
«Узун болгаш идепкейлиг назын» национал төлевилелди, федералдыг программаларны, кадык камгалалының регионалдыг төлевилелдерин боттандырары-биле кадык камгалал системазын быжыглаарынга болгаш аарыгларны болдурбазынга чугула көргүзүглерни чедип алганын база баштың демдеглээн. Хүндүскү эмнелгелерлиг дөрт амбулаторлуг салбырны ажытканындан эмчи реабилитациязының хандырылгазы беш катап хөй көвүдээн.
Тывада чигир аарыгларының үш школазын ажытканы-биле 1,3 муң аарыг кижилер чигир аарыын үргүлчү хайгаараар аргаларны шиңгээдип алган. Кардиологияда профилактиктиг угланыышкынны хөгжүткени чүрек-дамыр аарыгларлыг 275 кижилерниң аарыын кедеретпезинге дузалаан.
Кызылда болгаш кожууннарда кадыкшыл төптеринге чаа ажыл модельдерин кииргени-биле, амыдыралдың кадык овур-хевирин сагып чоруур хамаатыларның саны көвүдээн.
Республикада кадрлар айтырыын быжыглаар болгаш көдээ суурларда кадык камгалалының чедингирин бедидеринге дузалаар «Мээң эмчим» губернатор төлевилели база республика программалары идепкейлиг боттанып турар. Кадрларны деткиириниң темазы эмчи ниитилелиниң төлээлериниң хуралга көдүрген бирги айтырыы болган: беш чыл дургузунда аныяк эмчилерге чылдың-на 200 муң рубль компенсация төлевирин төлээр регионалдыг программаны катап эгелээр аргазының дугайында айтырыгны көдүрген. Ооң мурнунда бо программа-биле 327 аныяк эмчилерни хаара туткан, ол деткимче 153 эмчилерни республикаже эгидип алырынга дузалаан. Тываның Баштыңы программаны катап эгелээриниң аргаларын өөренип көөрүн Саң-хөө яамызынга дааскан.
Республиканың уруглар эмнелгезиниң коллективи уруглар садтарынга олуттарны ээлчег чокка бээриниң аргазын база айтырган. Амгы хоойлужудулга езугаар эмчи ажылдакчылары школа назыны четпээн уруглар садтарынче чиигелде чок болганындан, ниити оочур-биле отутту ап турарлар. Амгы үеде 156 эмчи ажылдакчыларының ажы-төлүнге садикче олуттар негеттинип турар, оларның хөй кезии Кызылда. Тываның Баштыңы ындыг чиигелде аныяк специалистерге улуг деткимче болуп, регионга херек кадрларны арттырарынга дузалаар деп чөпшээрешкен. Бо айтырыгны Тываның Өөредилге яамызынче база Кызылдың мэриязынче сайгарар кылдыр дамчыткан.
Оон ыңай Владислав Ховалыгның даалгазы-биле «Үш-Белдир» курортка дыштаныкчыларның болгаш ажылдакчыларның айыыл чок чоруун хандырарынга Тываның аңныыр хайгааралының күрүне комитеди дузалажыр. Бо чылын курортка 480 кижи кадышылын быжыглаан, ындыг болзажок «Үш-Белдирниң» коллективи курорттуң девискээринче кирип турар адыглар саны көвүдээнин дүвүрел-биле дыңнаткан. Дыштанылга сезонунуң үезинде курортка егерьлерни дежурныйладырын олар саналдаан.
Тываның Баштыңы шупту айтырыгларны ажылдаар кылдыр ап, оларны шиитпирлээриниң аргаларын ажылдап кылыр даалганы чогуур албан черлеринге берген. Тываның Баштыңы адырның мурнунда тургустунган айтырыгларны дорт чугаалааны дээш эмчилерге четтиргенин илередип, республиканың чурттакчыларының кадыкшылы дээш кызымаккай күш-ажылынга четтиргенин илереткен.