Улусчу фронт декабрь 19-та эфирге «Владимир Путин-биле чылдың түңнелдери» дамчыдылгалыг Россияның Президентизиниң парлалга-конференциязының үезинде хамаатылардан кирген дилеглерни шиитпирлээниниң чамдык түңнелдерин сайгарган.
Тываның чурттакчылары долгаашкыннар, бижиктер, смс-бижиктер, аудио-видео медээлерлиг 3600 ажыг дыңнадыгны күрүне Баштыңының адынче чоруткан. Оларның 2394-үн шиитпирлээри-биле республикада федералдыг эрге-чагырганың территориалдыг органнарынче, регионалдыг яамылар болгаш ведомстволарже, кожуун чагыргалар сайгарылгазынче чоруткан.
Улусчу фронт хамаатыларның айтырыгларын сайгарып турарынга хөй-ниити мониторингизин чорудуп турар, а регионалдыг, федералдыг, муниципалдыг эрге-чагырга органнары ол дилег бижиктерни хынап, шиитпирлээр харыысалгалыг дээрзин демдеглезе чогуур.
Тываның Өөредилге яамызынче эң хөй - 200 ажыг айтырыг кирген. Шупту айтырыгларны сайгарып көрген, хамаатылар боттарының айтырыгларынга харыыларны алган. Президентиниң парлалга-конференциязының соонда эң-не хөй айтырыглар алган беш ведомстволар аразында Өөредилге яамызындан аңгыда, Кадык камгалал яамызы, Күш-ажыл болгаш социал политика яамызы, Одалга болгаш энергетика яамызы, Чер болгаш өнчү-хөреңги хамаарылгаларның яамызы бар.
Тус чер чагырга органнарындан Кызыл мэриязынче эң хөй – 215 хире айтырыг келген.
Август 26-ның хүнү-биле алырга, бүрүткеттинген 1380 дилегниң 4-ү (0,3 хуузу) күүселдеде, 542-зи (39 хуузу) кылдынган, 698-зи (50 хуузу) кандыг-бир тодаргай шиитпирлер негеттинмес саналдар азы дилеглерден тургустунганындан хагдынган, 57-зи (4 хуузу) немелде хыналдада, 79-зун (6 хуузун) катап хынаар кылдыр чорутканын «ОНФ. Помощь» дыңнадыглар болгаш айтырыглар аайлаар информастыг система медеглээн.
Хамаатыларның дилээн чогумчалыг шиитпирлээн бир чижек: Кызылдың чурттакчызы Елена Б. Президентиниң дорт шугуму-биле МАХ мессенджер дамчыштыр харылзажып, пенсиязын шын санаарынга дузалаарын дилээн. Ол аныянда Владимир облазынга дүк ээрер бүдүрүлгеге ажылдап чораан. Кажан пенсияже үнүп турда, бүдүрүлгениң дүшкени-биле ол чылдары санаттынмайн барган. Ук дилегни сайгарары-биле Россияның социал фондузунуң Тыва Республикада килдизинче чоруткан. Килдистиң специалистери билдириишкин киирикчизи-биле харылзажып, бадыткал документилерин дилеп-тывар айтырыгны шиитпирлээринге дузалашкан. Ол херээжен кижиниң Владимир облазынга ажылдаан үелериниң камгаладылга стажы ооң пенсия санаашкынынче кирген.
Сүт-Хөл кожууннуң Суг-Аксы суурнуң чурттакчызы Мира О. Суг-Аксы биле Ишкин суурлар аразында оруктуң шынарынга хамаарыштыр айтырыгны күрүне Баштыңынга чоруткан. «Кожуун төвүнден суурже авторуктуң байдалы багай. Суг-Аксыдан Ишкинче орукту асфальтылап болур бе?» деп ол бижээн.
Дилегни республиканың Орук-транспорт яамызы-биле кады сайгарар кылдыр Сүт-Хөл кожуун чагыргазынче чоруткан. Суг-Аксы биле Ишкин суурлар аразынга муниципалдар аразының оруун экижидер айтырыг кожуун чагыргазының айтырыында элээн каш чылдар турганын айытса чогуур. 2025 чылда Орук-транспорт яамызының деткимчези-биле ол участокту бо чылдың септелге планынче киирген. Амгы үеде керээ чарган «Строй-экспресс» КХН чыл төнчүзүнге чедир доозар планныг орук ажылдарын кылып турар.
Хамаатыларның айтырыгларын чогумчалыг шиитпирлээниниң бо чижектери Президентиниң парлалга-конференциязының соонда регионалдыг болгаш тус чер эрге-чагыргаларының кылган ажылының чүгле эвээш кезиин көргүзүп турар.
Улусчу фронт 2025 чылда хамаатылардан кирген айтырыглары-биле ажылдаанының түңнелдерин анализтеп, «Владимир Путин-биле чылдың түңнелдери» программалыг 2026 чылдың үшкү кварталының төнчүзүнде, РФ-тиң Президентизинге база бир илеткелди киирерин планнап турар.