Бөгүн Кызылга, Тыва Арат Республиканың эки турачыларының төөгүлүг сактыышкын болгаш ат-алдарының хүнүнде, тыва эки турачыларның Ада-чурттуң Улуг дайынынче аъттанганындан бээр 83 чыл оюнга тураскааткан митинг болуп эрткен. Күрүне эрге-чагырга органнарының төлээлери, хоочуннар, тускай шериг операциязының киржикчилери, аныяк армейжилер, кадеттер, аныяктар, республиканың чурттакчылары тыва эки турачыларның тураскаалының чанынга маадырларга сактыышкынның мөгейиин кылган.
Таптыг-ла 83 чыл бурунгаар Тыва Арат Республика бодунуң оолдар, кыстарын фронтуже үдээн. Төрээн чуртунга ынакшылы-биле шимчеп үнген тыва эки турачылар Кызыл Шеригниң дайынчылары-биле чаңгыс одуругга турупкаш, ниити Тиилелгеге боттарның үлүг-хуузун кииргеннер. Бо хүнде оларның маадырлыг чоруу тыва чоннуң төөгүлүг оруунуң чугула кезээ болуп арткан.
«ТАР-ның дайынчыларының маадырлыг чоруун сактып тура, улуг чоргааралды болгаш төнчү чок өөрүп четтириишкинни илередип турар бис. Төрээн черинге ынакшыл-биле шимчеп үнген өгбелеривис бистиң шуптувустуң хосталгазын болгаш келир үезин камгалаар дээш, Кызыл Шеригниң дайынчылары-биле кады чаңгыс одуругга тулушканнар» - деп, республиканың Баштыңы Владислав Ховалыг республиканың чурттакчыларынга чугаалаан.
Ол ышкаш тиилекчи салгалдың эрес-дидим чоруу, бодун хайырлавааны – даанган хүлээлгезинге шынчы чоруунуң үлегери болгаш амгы салгалдарның амыр-тайбың амыдыралының үндезини апарган деп демдеглээн.
«Үрде манааны Тиилелгени чоокшуладып, дайын шөлүнге амы-тынын берген дайынчыларны-даа, амыр-дыжын бодавайн тылга ажылдап чорааннарны-даа шуптузун сактып чоруур бис» - деп, Тываның Баштыңы чугаалаан.
Митинги үезинде чурттуң болгаш Тыва Республиканың ыдык ырларын күүсеткен. Митингиниң киржикчилери маадырларга сактыышкынның минутазын кылып, Тыва эки турачыларның тураскаалынга боодал чечектерни салган. Ол хемчегге аныяк салгалче онза кичээнгейни угландырган. Ада-чурт камгалакчыларынга сактыышкынны кадагалап арттырарынга аныяк армейжилер болгаш кадеттер киржип, патриотчу кижизидилгениң ужур-чаңчылдарын уламчылааннар.
«Эрес-дидим болгаш чаңгыс демниг чоруктуң үлегер-чижээ бистиң бурунгаар оруувусту кезээде чырыдып чорзун дээш, бо сактыышкынны үнелеп, ажы-төлүвүске, уйнуктарывыска ону дамчыдып чоруулуңар» - деп, Владислав Ховалыг демдеглээн.
Амгы үеде тыва эки турачылар дугайында сактыышкын чүгле төөгү документилеринде эвес, а кудумчулар болгаш школалар аттарында, тураскаалдарда база мемориалдарда мөңгежиттинген. Кызылдың Тиилелге шөлүнүң тураскаал самбыраларында сиилбиттинген камгалакчыларның аттары тыва чоннуң эрес-дидим, сыныш чок хей-аъдының демдээ болур.
«Төөгүлүг бо хүн тиилекчилерниң салгалын база катап сактып, өөрүп четтиргенивисти илередип, чавыс мөгеер арганы берип турар» – деп, регионнуң удуртукчузу чугаалаан.