Республиканың Баштыңы бодунуң социал четкилери дамчыштыр Билиглер хүнүнде школачыларга болгаш студентилерге, башкыларга, ада-иелерге байырны чедирген. Владислав Ховалыг чурттакчы чонну байырлал-биле байыр чедирип тура, Ада-чурттуң Улуг дайынының маадырларын — тыва эки турачыларга сактыышкын хүнү сентябрь 1-ниң республикага онза ужур-утказын демдеглээн. Шак бо хүнде, 1943 чылдың сентябрь 1-де, фронтуже тыва эки турачыларның байырлыг үдээшкини болуп эрткен.
«Эргим школачылар болгаш студентилер! Хүндүлүг башкылар болгаш ада-иелер! Эртемнер хүнү-биле силерге байыр чедирип тур мен!
Бо хүн өг-бүле бүрүзүнге онзагай хөглүг болгаш байырланчыг хүн. Бо чылын эрткен чылга деңнээрге элээн хөй — 70 муң ажыг школачылар парталарынга олуруптар. Беш муң биргиклассчылар школаның эргинин бир дугаар артап, эртем-билигниң кайгамчык делегейин ажыдар.
Доозукчу класстарга бо чыл эң-не харыысалгалыг. А бистиң студентилеривиске мергежилинге шымнып кирип, улуг чуртталганы бүзүрелдиг эгелээриниң үези-дир. Чаа билиглер, солун ажыдыышкыннар болгаш шынчы эш-өөр-биле долган өөредилге чылы силерни манап турар. Бо дээрге хүн бүрүзү чаа билиглерни болгаш уттундурбас харылзааларны эккеп турар үе-дир.
Тывага сентябрьның 1 – Ада-чурттуң Улуг дайынының үезинде эрес-дидим чорукту болгаш бодун өргүп каан тыва эки турачыларга төөгүлүг сактыышкынның болгаш хүндүткелдиң хүнү болур чоргааралдың болгаш мөгейигниң онзагай хүнү. Өгбелеривистиң маадырлыг чоруу бисти төрээн черивиске сеткилинден ынак болуп, амыр-тайбыңны үнелээринге өөредип турар. Бистиң эрес-дидим чаңгыс чер чурттугларывыс чурттуң бот-догуннаашкынын камгалап, салгалдарның аразында харылзааны болгаш Ада-чуртувуска чоргааралды бөгүн миннип турар бис.
Эргим оолдар, уруглар! Эки өөрениңер, салым-чаяаныңарны ажыдып, найыралды үнелеп, башкыларыңарны хүндүлеп чоруңар. Бурунгаар дидим базып, чогаадып, тиилеп чоруңар.
Хүндүлүг башкылар болгаш ада-иелер! Силерге шыдамык чорукту, тура-сорукту, ажы-төлүңерниң чедиишкиннери дээш эң-не улуг өөрүшкүнү күзедим.
Байырлал-биле! Чаа өөредилге чылы-биле!»- деп, республиканың Баштыңы байырны чедирген.