Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев «Сибиряк» инвалидтер болгаш кадыы кошкак кижилерниң күш-культура-спортчу клуву» деп автономнуг коммерцияга хамаарышпас автономнуг организацияның удуртукчулары-биле ажылчын ужуражылганы эрттирген.
Электроколяскалыг футболду хөгжүдеринче, доктаамал тренировкалаар байдалдарны тургузарынче база спортчуларны бүгү-российжи маргылдааларга белеткээринче кол кичээнгейни угландырган. Ужуражылга адаптивтиг спорттуң төлээлери-биле чоруп турар чугааны уламчылаан.
«Сибиряк» клубтуң кежигүннери бүрүн эргелиг төлээниң удуртулгазы-биле чоруттунган ажылдарның ачызында спортчуларга белеткенир спорт залды халас ажытканын демдеглээннер. Удавас ону септеп, электроколяскалыг ПОДА-футболга тренировкалаар черни тускай дериг-херекселдер-биле хандырар.
Новосибирск хоорайның «Чкаловец» биле «Сибиряк» командалары амгы үеде Россияның ПОДА-футбол чемпионадынга киржип турар. «Восток» дивизионунга эрткен баш бурунгаар оюнга «Чкаловец» командазы үшкү, а «Сибиряк» чедиги черни ээлээн. Октябрьның 23-тен 27-ге чедир түңнел оюннар болуп эртер. Оон аңгыда ол командалар 2026 чылдың декабрьда болуп эртер Россияның кубогу дээш ойнаар планныг. Ийи команданың спортчулары маргылдааның түңнелдеринге даянгаш, спортчу разрядтарже кордап болур.
Новосибирск облазының спорт яамызы адаптивтиг спортту сайзырадыры-биле Новосибирск облазының футбол федерациязы-биле кады электроколяскалыг кижилерге ПОДА-футболга область чемпионадын болгаш кубогун эрттирерин планнаан. Маргылдаалар октябрь, ноябрь айларда Бердск хоорайга болур.
Адаптивтигспорттуң спортчуларын болгаш тренерлерин ажылче хаара тударының айтырыгларын база тускай шериг операциязының киржикчилеринден тургустунган командаларга спортчу дериг-херекселдер-биле хандырарын план езугаар шиитпирлеп турар. Чогуур албан черлери спортчуларны доктаамал деткиирин ам-даа уламчылаар.
«Адаптивтиг спортту хөгжүдери – эрге-чагырганың бүгү деңнелдериниң болгаш спортчу ниитилелдиң демниг ажылы негеттинип турар ниити айтырыг болур. Бо угланыышкында базым бүрүзү кол сорулгаже – кадыкшылы кызыгаарлыг спортчуларга белеткенип, сайзырап, түңнелдерни чедип алыр байдалдарны тургузарынче бисти чоокшуладып турар» - деп, Анатолий Серышев демдеглээн.
Ук хемчегге Новосибирск облазының губернаторунуң оралакчызы Константин Хальзов, Новосибирск облазының спорт сайыды Сергей Ахапов, Новосибирск облазының күш-ажыл болгаш социал хөгжүлде сайыды Елена Бахарева, Новосибирск хоорайның мэри Максим Кудрявцев киришкен.
Тайылбыр:
ПОДА-футбол дээрге шимчээшкини кызыгаарлыг кижилерге тааржыр адаптивтиг спорт хевири-дир.