Чаа 2026/2027 өөредилге чылын эгелээринге өөредилге системазы бүрүнү-биле белен деп, Тыва Республиканың Өөредилге яамызы дыңнаткан. Чаа өөредилге чылында школачыларның саны 71,5 муң хире болур, эрткен чылдың көргүзүглеринден элээн хөй - ынчан республиканың школаларынга 69 муң уруглар кирген. Беш муң хире биргиклассчылар бир дугаар школаже кирер. Билиглер хүнүнге тураскааткан байырлыг чыскаал сентябрь 1-де чаңчыл ёзугаар болуп эртер.
Өөреникчилерниң бо саны баш бурунгаар медээ дээрзин ведомство демдеглээн. Тодаргай сан-чурагай сентябрь 10 соонда билдине бээр.
11,5 муң хире специалистерден тургустунган регионнуң башкылар ниитилежилгези Россияның Чырыдыышкын яамызының чарлааны элээн каш чаартылгаларны боттандырып, өөредилге чорудуун хандырарынга белен.
Чаа өөредилге чылында киирген чаа кол чүүлдер:
• 2026/2027 өөредилге чылының ийиги чартыындан 5-ки класстарга "Россияның сүлде-сүзүк болгаш мөзү-шынар культуразы" эртемни өөренип эгелээр;
• 2027 чылдың сентябрь 1-ден ол эртемни 6–7 класстарга өөренир;
• 5–7 класстарга даштыкы дылды неделяда 3 шак эвес, а 2 шак өөренир, а хосталы берген шактарны төөгү кичээлинче база чаа эртемче угландырар;
• 6–8 класстарга ниитилел бидлиглериниң темаларын төөгү курузунче каттыштырар, 9 класстан эгелеп ниитилел билиглерин бот өөренир;
• дараазында чүүлге кызыгаарлаашкын хевээр артар: эртем бүрүзүнге контрольдуг болгаш хыналда ажылдар өөредилге үезиниң 10 хуузундан ашпас ужурлуг;
• чамдык школаларга корум-чурумунга демдек салырын шенеп көөр болгаш ол кижи бүрүзүнге албан эвес болур.
Сөөлгү чаа чүүлге хамаарыштыр, чаа өөредилге чылында Тываның 10 школазы 2–8 класстарның өөреникчилеринге корум-чурумунга демдек салырының системазын шенээр шенелде төлевилелге киржир. Чаа система чурумун демдеглээринден аңгыда, а өөреникчилерниң корум-чурумунга харыысалгазын улгаттырып, коллективке билчилгелиг харылзааны тургузарынга дузалаар.
Ниити өөредилге албан черлериниң чоокку үеде кол сорулгазы — өөредилге чорудуунуң шупту киржикчилеринге шенелде чүүл ажык-чарлыг болгаш чедимчелиг эртер кылдыр башкыларга методиктиг деткимчени көргүзер деп, Тываның Өөредилге яамызы демдеглээн.
Ада-иелер уругларынга кандыг дүрүмнер школада ажыглаттынып эгелээрин билип алыр дизе, школаның албан езузунуң сайтызын көрүп азы класс башкызы-биле харылзажырын сүмелеп турар. Федералдыг чаартылгаларны Россияның Чырыдыышкын яамызының, Рособрнадзорнуң база Федералдыг педагогиктиг шинчилелдер институдунуң (ФИПИ) сайтыларындан көрүп болур.