Владислав Ховалыг Москвага сургакчылап чорааш, Россияның өөредилге сайыдының оралакчызы Андрей Николаев-биле ажылчын ужуражылганы эрттирген. Президент Владимир Путин бо чылдың майда регион губернатору-биле хууда ужуражылга үезинде федералдыг болгаш регионалдыг эрге-чагырганың мурнунга салганы айтырыг – республикада школалар болгаш уруглар садтарының тудуунуң болгаш чаартылгаларының дугайында чугаалашкан.
Күрүне баштыңы регион эрге-чагыргазының онза кичээнгейи негетинип турар кол айтырыг кылдыр социал инфраструктураны хөгжүдери, тодаргайлаарга, школа назыны четпээн чаа албан черлерин болгаш школаларны чаартырын болгаш тударын демдеглээн турган.
Тывада ийи ээлчегде өөренип турар уруглар саны российжи ортумак көргүзүгден ийи катап хөй дээрзин Президент демдеглээн. Шак ындыг байдал школа назыны четпээн уруглар албан черлеринге база хамааржыр. Президент ол айтырыгга онза кичээнгейни салырын дилээн.
«Тываның өөредилге системазында байдал онза кичээнгейни негеп турар. Элээн каш көргүзүглерде, ылаңгыя школалар болгаш уруглар садтарында уруглар саны-биле, регион российжи ортумак көргүзүгден ылгалдыг. Ол угланыышкын кол кичээнгейде болуп арткан. Ажылдар чоруп турар, ол айтырыгларны шиитпирлээринге регионну деткиириин уламчылаар бис» - деп, Андрей Николаев чугаалажыышкыннар үезинде демдеглээн.
Владислав Ховалыг ийи ээлчегде өөренир айтырыгны шиитпирлээр дээш регионнуң чорудуп турар ажылдарын илеткээн. Сөөлгү каш чылдарда 11 чаа школа туттунган, ыраккы Мөңгүн-Тайга кожуунда база бир школа 2026 чылда ажыттынар. Бо чылын Туранда чаа школа тудуу эгелээн, келир чылын Торгалыг суурда школаны ажыглалче киирери планнаттынган.
Бар школаларга капитал септелгелерни болгаш эде чаартылгаларны чорудуп тургаш, айтырыгны шиитпирлеп турар. Бо үеге чедир 55 школада капитал септелгелерни кылган, оларның чамдыызын чүгле чаарттынган эвес, а класстар шөлдерин база калбарткан. Бо хүнде 174 школаның 68-инде 30 муң ажыг уруглар ийи ээлчеглиг өөренип турар.
«Андрей Викторович-биле объектилер тудуунуң амгы байдалын болгаш оларны акшаландырарын тодаргай сайгардывыс. Моон-даа соңгаар сырый кады ажылдаарын дугуруштувус. Тываның хереглелдеринге улуг кичээнгейни салып турары дээш РФ-тиң Чырыдыышкын яамызынга четтиргеним илереттим» - деп, Владислав Ховалыг ужуражылга соонда МАХ-та бодунуң каналынга бижээн.
РФ-тиң Чазааның Даргазы Михаил Мишустин мооң мурнунда Тывага кээп чорда, Владислав Ховалыг регионда 29 школаны болгаш 15 уруглар садтарын өөредилге черлерин эде чаартырының федералдыг программазынче киирерин дилээн.
Россияның Чазааның Даргазы регионга келгениниң түңнелинде, хыналда үезинде көдүртүнген айтырыгларны, ооң иштинде Тыва Республиканың социал-экономиктиг хөгжүлдезин деткиир талазы-биле элээн каш даалгаларны берген.
Ылаңгыя Чазак Даргазының оралакчызы Дмитрий Чернышенкога Россияның Чырыдыышкын яамызы-биле кады өөредилге объектилериниң капиталдыг септелге программазынче Тывада элээн каш школаларны болгаш уруглар садтарын киирерин ажылдап кылырын дааскан.