Тывада университет, колледж студентилеринге болгаш доозукчуларынга албан-ажылга депшип ажылдаарының сессиялары болуп эрткен. Ужуражылгалар аныяк специалистерниң ажыл дилээринге белеткелинге, хереглелдиг ажылчын олуттарны билип алырынга болгаш ажыл берикчилери-биле дорт чугааны кылырынга дузалаан.
Албан-ажылга депшип ажылдаарының сессиялары Кызылда «Россияның ажылы» кадрлар төвүнге база Улуг-Хем, Бии-Хем, Барыын-Хемчик, Ак-Довуракта кожуун салбырларынга эрткен. 88 доозукчу аңаа киржири-биле бүрүткеткен, оларның 78-и мастер-классты дооскаш, чугаалажылгаже кирген.
Ужуражылганың бирги кезээнде, Кадрлар төвүнүң специалистери киржикчилерге «Россияда ажыл» порталды ажыглаарын тайылбырлаан. Аныяктар хууда кабинединге бодунуң медээлерин шын долдурарын, резюме тургузарын, арга-дуржулгазын болгаш стажировка эрткенин айтырын, тааржыр хостуг ажылчын олуттарны тып, ажыл берикчилеринге канчаар харыыны бээрин билип алганнар.
«Аныяктар ажыл дилээриниң аргаларын канчаар ажыглаарын база чаңгыс аай чурагай шөлдери дамчыштыр саналдарга харыылаарын база шиңгээткеннер» — деп, Кадрлар төвүнүң кол специализи Айгуля Дажий-оол чугаалаан.
Сессияның ийиги кезээ ажыл берикчилери-биле ужуражылгалар болган. Республиканың организациялар болгаш бүдүрүлгелер төлээлери хостуг олуттарны, кордакчыларга негелделерни, стажировкалаар аргаларны, профессионал өзүлде дугайында таныштырган.
20 хире организациялар доозукчулар-биле ужуражылгаларга киришкен. Ажыл берикчилери 100 ажыг хостуг ажылчын олуттарны салып, доозукчуларга ажылдаар болгаш стажировкалаар 51 саналды киирген. 32 аныяк специалистер саналдарны хүлээп алган.
«Студентилер ажыл берикчилеринге дорт айтырыгларны салып, корпоративтиг культура, албан-ажылга депшиириниң аргаларын билип алганнар. Хөй киржикчилер ажыл берикчилери-биле харылзаажыр аргаларын солчуп, келир үеде ажылче кирер бодунуң байдалын база сайгарып чугаалашкан» - деп, хоорай килдизиниң начальниги Айдысмаа Сарыглар демдеглээн.
Албан-ажылга депшип ажылдаарының дугайында сессиялар аныяк специалистерге ажыл дилээриниң практиктиг аргаларын билип, ажыл берикчилери-биле таныжарынга болгаш ажылга тургустунарының баштайгы базымнарын кылырынга дузалап турар. «Россияның ажылы» кадрлар төвү республикада студентилерни болгаш доозукчуларны ажылга хаара тудар талазы-биле ажылын ам-даа уламчылаар.