Тываның Баштыңы Владислав Ховалыг Россияның саң-хөө сайыды Антон Силуанов-биле ужурашкан. Регионнуң акшаландырыышкыны, социал хүлээлгелер күүселдези, республикада чуртталга тудуун моон-даа соңгаар деткиири ужуражылганың кол темалары болган.
Россияның Чазаа Тываның хөгжүлдезинче онза кичээнгейни салып турарын Владислав Ховалыг демдеглээн. Республика бюджединде кызыгаарлаашкыннар бар-даа болза, социал угланыышкынныг бюджетти арттырары болгаш чурттакчы чоннуң мурнунга хүлээлгелериниң шуптузун күүседирин хандырары чугула.
Бирги ээлчегде социал төлевирлер болгаш чиигелделер, бюжет адырының ажылдакчыларын, ол ышкаш тускай шериг операцияларының киржикчилерин болгаш оларның өг-бүлелерин деткиир дугайнда чугаа чоруп турар. Федералдыг чазак-биле бо айтырыгларга удур-дедир билчилге чедип алдынган. Ужуражылга үезинде республиканың чурттакчыларынга чылда 2 хуу ставкалыг чиигелделиг ипотека программазын 2027 чылга чедир узадырының аргаларын сайгарып чугаалашкан.
«Бо программа бодунуң үре-түңнелдиин көргүскен. Ооң ачызында республикада чуртталга тудуу элээн көвүдээн, о ышкаш дыка хөй өг-бүлелер боттарының бажыңнарын садып ап шыдааны – эң-не кол болган. Эки бурунгаарлаашкынны кдагалап арттырары биске чугула" — деп, Владислав Ховалыг демдеглээн.
Тываның Баштыңы программаны уламчылаары Россияның Президентизи Владимир Путинниң чуртталга тудуунуң бедик темпизин кадагалап арттырар дээн даалгазы-биле дүгжүп турар дээрзин демдеглээн. Тудуг адырын деткиири федералдыг политиканың мурнады боттандырар угланыышкыннарның бирээзи бооп арткан.
«Саң-хөө яамызының туружу бистии-биле дүгжүп турар: программаны уламчылаар, ону узадырының арга-хевирлериниң техниктиг талазын ажылдап кылыр» – деп, регионнуң удуртукчузу республиканың айтырыгларын кады шиитпирлээринге белени дээш Антон Германовичиге болгаш ооң федералдыг яамыдан коллегаларынга четтиргенин илереткен.