Тываның Баштыңы Владислав Ховалыг Россияның спорт сайыды Михаил Дегтярев-биле Москвага ужурашкан. Республиканың спортчу инфраструктуразының хөгжүлдезин база күш-культура болгаш спортта доктаамал белеткелдиг чурттакчылар санын көвүдеп турарын ийи тала чугаалашкан.
Федералдыг деткимче-биле Тывада ол ажыл «Россияның спорту» күрүне программазы-биле чоруп турар. Регионнуң бир кол сорулгазы – 2030 чылга чедир чурттакчы чоннуң 70 хире хуузун доктаамал спортче хаара тударын чедип алыры болур.
Михаил Дегтярев Тывада спорт-биле өңнүк кижилер саны чылдан чылче өзүп турарын демдеглээн. Бөгүн республика чурттакчыларының 83 хуузун спортчу инфраструктура-биле хандырар планныг көргүзүгнү 85 хуу чедирген.
Тывада спорт объектилер тудуу болгаш септелгези бо чылын база уламчылавышаан. Оларның аразында амгы үениң «угаанныг» спортчу шөлдери, күш-культура-кадыкшылга комплекстери, хүреш залдары, ГТО-га (Күш-ажылга болгаш камгалалга белен) белеткел шөлдери бар. Чүгле Кызылда эвес, а республиканың шупту муниципалдыг тургузугларында чаа инфраструктура туттунуп, чурттакчыларга бажыңының чоогунга спорт-биле өңнүктежир арганы тургускан.
«Тываже кичээнгейни салып, бистиң төлевилелдеривисти деткип турары дээш Россияның Спорт яамызының удуртулгазынга четтиргеним илереттим. Кады күжениишкиннеривис-биле республиканың чурттакчыларының хөй кезиинге спортту амыдыралдың чарылбас болгаш чедингир кезээ кылдыр кылыптарывыска бүзүрээр мен» — деп, Владислав Ховалыг чугаалаан.