Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев Сибирь регионнарында дүжүт ажаалдазының кампаниязының дугайында округ хуралын эрттирген. Амгы байдал, көдээ ажыл-агый техниказы, чемишчидилге, кывар-чаар чүүлдер-биле хандырылга дээш, оон-даа өске айтырыгларны хуралда сайгарган.
Эрткен чылын берге агаар-бойдус турза-даа, Сибирь тарааның рекордтуг – 18,5 млн тонна хире дүжүттү ажаап алган. Алтай край, Омск биле Новосибирск облазы хөй дүжүттү алган. Ол ышкаш Красноярск край база Кузбасс база бедик түңнелдерни чедип алганын демдеглээн.
Бо чылын дүжүт ажаалдазынга агаар-бойдус база катап улуг салдарны чедирген. Округтуң барыын кезээнде элээн каш регионнарга кааңдаашкындан онза байдалды чарлаан турган. Ындыг болзажок Сибирьниң чер ажылдыглары нарын байдалдарда ажылдап билирин эрткен чылын дүжүт ажаалдазының сезонунда көргүскенин бүрүн эргелиг төлээ демдеглээн. Бөгүнде дүжүт шөлдериниң дөрттүң бир кезиинде дүжүттү ажаап дооскан. Дүжүттү үе шаанда ажаап, ону кадагалап шыгжаарынга дузалажыр айтырыгже онза кичээнгейни углаан. Регионнар удуртукчулары ажылдарны кичээнгейге ап, херек апарза, ажыл-агыйларга деткимче хемчеглерин дарый хүлээп алыр даалганы алган.
Россия Федерациязының Президентизи Владимир Путин ажыглаттынмайн чыдар көдээ ажыл-агый шөлдерин катап ажыглалче киирер сорулганы салганын, бүрүн эргелиг төлээ сагындырган. Бо сорулга черни шын ажыглаарынче, агроүлетпүр комплекизин хөгжүдеринче, продукция бүдүрүлгезиниң хемчээлин көвүдедиринче угланган.
Берген медээлерден алырга, амгы техника парыгын бүрүнү-биле белеткээн, ынчангаш дүжүт ажаалдазын чогуур үезинде доостур ужурлуг. Чаа көдээ ажыл-агый техниказын план езугаар садып ап турар. Ажыл-агыйларны херек чемишчидилге-биле хандырган.
Хурал үезинде дүжүт ажаалдазында кывар-чаар чүүлдер-биле хандырылганы база чугаалашкан. Анатолий Серышев аъш-чем болгаш болбаазырадылга үлетпүрүнүң бүдүрүлгелерин кывар-чаар чүүлге хереглелин долу хандырарынче, база хандырыкчыларның курлавырда хемчээлин үезинде билип алырынче кичээнгейни углаан. Кандыг-бир бергедээшкиннер тургустунуп келзе, Россия Федерациязының Энергетика яамызы-биле кады дүрген хемчеглерни алыр кылдыр Россияның Көдээ ажыл-агый яамызынче дарый дыңнадыр болза эки.
«Ужудукчу чок авиация системалары» национал төлевилел-биле улуг деткимчени ап турар хамааты адырларга, ылаңгыя көдээ ажыл-агыйынга амгы үениң технологияларын киирери - чугааның бир темазы болган. Алтай крайның арга-дуржулгазы үлегерлиг чижек деп айыткан, бо чылын 100 муң гектар чедир шөлдерни ужудукчу чок ужар системалар-биле болбаазырадыры планнаттынган. Бүрүн эргелиг төлээ ол практиканы өске регионнарга ажыглаарын чыылганнарга сүмелээн.
Эрткен чылдың бо үезинге деңнээрге, бо чылын агроүлетпүр комплекизиниң продукциязының экспорт хемчээли 24 хуу, а тараа культураларының 43 хуу хөй болган. Бүрүн эргелиг төлээ амгы темпини кадагалап арттырары чугула деп санаан. Бар контейнер төптериниң аргаларын болгаш чөөн чүктүң порттарының чүък чүдүрүлгезиниң хемчээлин көвүдетпишаан, логистика четкилерин тудар, тарааны контейлерлеп чүдүрериниң хемчээлин көвүдедир ажылдарны уламчылаары чугула. Бүрүн эргелиг төлээ элээн каш регионнардан, ооң иштинде Сибирьден чүък сөөртүлгезин субсидиялаарынче федералдыг акша-хөреңгини немей тускайлаарын сагындырган. Чер ажылдыглар ол деткимчени долузу-биле ажыглаар ужурлуг.
Анатолий Серышев АҮК күрүне деткимчезиниң темазын уламчылап тура, август ортанга чедир күрүне деткимчезиниң ниити түңүнүң 49 хуузун аграржылар алганын демдеглээн. Хакас Республикада, Красноярск крайда, Кемерово облазы – Кузбасста, Омск облазында, Томск облазында бо көргүзүг российжи ортумак көргүзүгден бедик. Бүрүн эргелиг төлээ аграржыларга деткимчениң аргаларын болгаш алыкчыларга субсидияларны бээрин дүргедедир немелде хемчеглерни хүлээп алырын дааскан.
Россия Федерациязының көдээ ажыл-агый сайыдының бирги оралакчызы Елена Фастова, федералдыг округ субъектилериниң баштыңнары, чогуур регионалдыг эрге-чагырга органнарының удуртукчулары, федералдыг монополияга удур албанның территориалдыг органнарының удуртукчулары, регионнарда кол федералдыг инспекторлар, Россельхозбанк биле Росагролизинг салбырларының удуртукчулары хемчегге киришкен.