Тыва Республикага 2 хуу чиигелделиг ипотека программазын кады акшаландырарынче Россияның Чазааның курлавыр фондузундан 574 млн ажыг рубльди тускайлаан. Россияның Чазааның Даргазы Михаил Мишустин аңаа хамаарышкан айтыышкынга атты салган. Чазак Даргазы август 24-те оралакчылары-биле эрттирген хуралга ындыг шиитпирни хүлээп алганын дыңнаткан.
Тускайлаан акша-хөреңги регионда чуртталга бажыңнарын садып алырынга азы тударынга 4,3 муң ажыг чиигелделиг чээлилерни субсидиялаар.
Михаил Мишустин документини хүлээп алганын дыңнадып тура, 2026 чылдың август эгезинде Тывага ажыл-албан кылып чорааш, республиканың бот-тускай социал-экономиктиг хөгжүлде программазының күүселдези-биле танышканын дыңнаткан.
«Орук болгаш чуртталга тудуунуң адырында төлевилелдерни канчаар боттандырып турарын, хөй-ниити шөлдерин канчаар экижидип турарын, амгы үениң кварталдары болгаш микрорайоннары канчаар туттунуп турарын аңаа тодаргай танышкан бис. Федералдыг деткимче хемчеглериниң хөй кезии – социал-экономиктиг хөгжүлдениң бот-тускай программазы, инфраструктураның бюджет чээлилери, ол ышкаш Президентиниң даалгазы-биле регионга эгелээн 2 хуу ставкалыг чиигелделиг ипотека программазы ону деткип турар. Бо программа езугаар 3300 ажыг чээлилерни берген. Күрүне баштыңының шиитпири-биле ол программаны ам-даа калбартып, бо чылын 1 муң чээлини бээр ужурлуг. Чаа квартиралыг азы бажыңныг болуксаан кижилер ипотека программазын дораан ажыглаар кылдыр, республика бюджединче чартык миллиард ажыг рубльди кады акшаландырыышкынче чорудар бис» - деп, премьер-министр чугаалаан.
Тываның Баштыңы Владислав Ховалыг федералдыг төптүң шиитпири регионга чугула херек деп демдеглээн. База ол ышкаш ажы-төлдүг өг-бүлелерниң чурттаар байдалын дүрген болгаш дарый экижидер арганы бээр ипотека долдуруушкуну бөдүүн болгаш билдингир болур ужурлуг деп айыткан.
Тываның Баштыңы регионну бүгү талазы-биле деткип турары дээш, Президентиге болгаш федералдыг чазакка четтиргенин илереткен.
Владимир Путин биле республика баштыңы Владислав Ховалыгның 2022 чылдың сентябрьда чугаалажыышкыннарының түңнелинде, 2023 чылда Тывага чиигелделиг ипотека программазы ажылдап эгелээн.
Республиканың удуртукчузу бо чылдың майда чурт баштыңынга ужурашкаш, программа күүселдезиниң дугайында таныштырып тура, Тыва 2025 чылдың төнчүзүнге чедир кижи санынга онааштыр чуртталга тудуун кииргениниң талазы-биле чуртта эң тергиин 10 регион санынче киргенин илеткээн.
Владислав Ховалыг тудуг болгаш чуртталга адырларында эки өскерлиишкиннерни илеткевишаан, ооң-биле чергелештир программаның хуусаазын ам-даа узадырын күрүне баштыңындан дилээн. Президент ол саналды деткээн.
Тывага программаны боттандырып эгелээнден бээр, ажы-төлдүг 3,3 муң өг-бүлелер күрүне деткимчезиниң ачызында чиигелделиг ипотека чээлизи-биле чурттаар оран-саваны садып алыр аргалыг болган.