Дүүн, август 24-те, Тываның өөредилге ажылдакчыларының чылдың август республика хуралы Кызылга болуп эрткен. Тываның Баштыңы Владислав Ховалыг ооң ажылынга киришкен.
Август хуралы өөредилге системазының ажылын түңнеп, чаа өөредилге чылының кол сорулгаларын тодарадыр чаңчылчаан шөл апарган. Бо чылда ооң сорулгазы – өөредилег адарында күрүне политиказының федералдыг негелделери болгаш мурнады боттандырар угланыышкыннарын барымдаалап, 2026–2027 өөредилге чылында ажыл чорудуун тургузары. Хуралга тус чер чагыргаларының өөредилге органнарының удуртукчулары болгаш специалистери, муниципалдыг чагыргалар төлээлери, республиканың өөредилге организацияларының удуртукчулары болгаш башкылар коллективтери, чалаттырган аалчылар киришкен.
Хуралдың киржикчилери өөредилге системазының хөгжүлдезинде амгы чугула айтырыгларны сайгарган. Школа болгаш школа назыны четпээн уруглар өөредилгезин тудары, башкы болгаш удуртукчу кадрларны белеткээри, тускай психолог-педагогиктиг класстарны хөгжүдери, профугланыышкын ажылын сайзыраңгайжыдары, ортумак профессионал өөредилгени хөгжүдери, «Профессионалитет» төлевилелди боттандырары – кол кичээнгейде болган.
Кижизидилге ажылы, уругларга немелде өөредилге, өөредилгеге хамаарылгалыг киржикчилерге психолог-педагогиктиг деткимче айтырыгларын аңгы шөлге сайгырып чугаалашкан. Оон аңгыда уруг азырап алганнарга деткимчениң чаа хемчеглерин база уругларга болгаш аныяктарга өөредилге төлевилелдерин база аңгы чугаалашкан.
Владислав Ховалыг республикада өөредилге хүрээлеңи комплекстиг хөгжүп турарын демдеглээн: школалар болгаш уруглар садтары чаарттынып, тускай угланыышкынныг агрокласстар ажыттынып, «Профессионалитет» төлевилелдиң кластери тургустунган. Сбер база Яндекс дээн ышкаш IT индустрияның лидерлери-биле кады ажылдажылга калбарган.
«Башкыларны деткиири бо ажылдың чугула кезээ бооп артпышаан. «Чаңгыс демниг Россия» партияның эгелээшкиннериниң ачызында башкы мергежилдиң тускай эрге-байдалын хоойлуда быжыглаан болгаш оларның өг-бүлелеринге социал магадылалдар системазы калбарган» - деп, республика Баштыңы демдеглээн.
Регионнуң удуртукчузу байырлыг байдалда күрүне шаңналдарын тывыскан. Өөредилгеге ачы-дузазы болгаш хөй Тес-Хем кожуундан өөредилгениң хоочуну Эртине Очур-Хоо өөредилге адырында ачы-хавыяазы болгаш хөй чылдарда ак сетклдиг ажылы дээш Тыва Арат Республиканың тургустунганындан бээр 100 чыл оюнга тураскааткан юбилейлиг медаль-биле шаңнаткан. Башкылар Александр Моисеев биле Андрей Золотухинге Тываның Баштыңының Хүндүлел бижиктерин тывыскан.
«Тыва Республиканың өөредилгезиниң алдарлыг ажылдакчызы» хүндүлүг атты башкылар Константин Донгакка, Алефтина Хомушка, Людмила Сегленмейге, Марина Монгушка, Мариана Кыргыска, Елена Скачекке тывыскан.
«Тыва Республиканың мурнунга ачы-дузазы дээш» деп Тыва Республиканың медалынга Тываның Улусчу ус-шеверлер техникумунуң директору Чапа Донгак төлептиг болган.
Тываның Баштыңы боттарының мергежилинге бердингени, аныяк салгалды кижизидеринге үлүг-хуузун кииргени дээш башкыларга өөрүп четтиргенин илереткен.
«Мурнувуста ажылдар-ла хөй. Кады кады Төрээн Тывавыстың болгаш бүгү Россияның чаагай чоруу дээш ажылдаар аргалыг, амгы үениң кандыг-даа кыйгыларынга белен салгалды кады кижизидип өстүреривиске бүзүрээр мен» - деп, Владислав Ховалыг чугаалаан.