Тываның Баштыңы Владислав Ховалыг бодунуң албан езузунуң блогунда, Мьянманың президентизи Мин Аунг Хлайнның республикаже аалдап кээп чораанының дугайында дыңнаткан. Даштыкы күрүнениң удуртукчу болгаш кады келген делегациязының кежигүннери регионнуң найысылалы Кызылда тураскаалдыг черлерни кезип, экскурсиялар үезинде Тываның төөгүзүн кысказы-биле танышканын дыңнаткан.
Кызылдың кол онзагай черлериниң бирээзи: күчүлүг Улуг-Хемниң эриинде «Азия төвү» скульптура комплекизи республиканың аалчыларынга уттундурбас сактыышкынны арттырган тураскаал болган. Амгы бо тураскаалды 2014 чылда Тыва биле Россияның демнежилгезиниң 100 чылдаанында кылган. Ады-сураа алгаан бурят чурукчу болгаш архитектор Даши Намдаков – ук төлевилелдиң автору.
Аалчылар Алдан-Маадыр аттыг национал музейге алдарлыг скиф алдынның коллекциязы-биле танышканнар. IV делегей чергелиг буддийжи форум эгелеп турда, Чиңге-Тей I базырыындан археологтарның тыпканы ховар дээн эдилелдерниң делгелгези ажыттынган. Эртемденнер ховар дээн тывыштарны Эрмитажка шинчилээш, чаартып кылганының соонда, чоокта чаа Тываның музейинче эглип келген чаартынган коллекцияны хүндүлүг аалчылар магадап көргеннер.
В. Көк-оол аттыг Национал театрга Тываның уран чүүл мастерлери делегацияга оюн-көргүзүүн бараалгаткан. Ылаңгыя тыва хөөмей-сыгыт болгаш Национал оркестрниң хөгжүм күүселдези Мьянманың төлээлерин кайгадыпканын Владислав Ховалыг демдеглээн. «Диңмиттиг адыш часкаашкыннары бистиң артистеривиске эң-не эки шаңнал болган» - деп, ол чугаалаан.
Мин Аун Хлайн найысылалды кезип чорааш, хоорайның болгаш долгандыр бойдус-чурумалдың каас-чаражын, ол ышкаш тус черниң чурттакчыларының хүндүлээчелин демдеглээн деп, Тываның Баштыңы дыңнаткан. Аян-чорук кыска үе ишти үргүлчүлээн-даа болза, Мьянманың Президентизи болгаш ооң делегациязының кежигүннери Азияның төвүнде республиканың дугайында тодаргай билип ап, Тываның турисчи күчү-шыдалынга бедик үнелелди берген.
«Мьянманың баштыңын үдеп тура, бистиң республикавыстың онзагай культуразы болгаш чону-биле оон-даа чоок таныжар кылдыр, база катап аалдап кээринче чаладым» - деп, Владислав Ховалыг дыңнадыында бижээн.