Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев 2026 чылдың сентябрь 20-де болуп эртер чаңгыс аай соңгулда хүнүнде соңгулдаларга белеткелдиң болгаш ону эрттирериниң талазы-биле улуг хуралды видеохарылзаа таварыштыр эрттирген.
Чаңгыс аай бадылаашкын хүнүнге чедир бир ай арткан болгаш, соңгулдаларга белеткелдер сөөлгү чадазында келгенин Анатолий Серышев дыңнаткан. Россия Федерациязының Күрүне Думазының депутаттарынче ам болур соңгулдалар чурт иштинде политиктиг турум чорукту, хамааты чаңгыс демни, турум хөгжүлдени хандырарынга, ол ышкаш даштыкыдан кыйгыларга болгаш айыыл-халаптарга удур чедимчелиг ажылдаарынга стратегтиг ужур-дузалыг дээрзин ол демдеглээн. Бүрүн эргелиг төлээниң бодалы-биле алырга, бо байдал соңгулдаларның шупту киржикчилеринге улуг харыысалганы онаап турар.
«Россия Федерациязының Президентизи Владимир Путин соңгулда кампаниязының түңнелдери ажык-чарлыг, шын, чоннуң күзел-соруун илереткен болзун дээш, хоойлу езугаар шыңгыы эртер ужурлуг дээрзин чаңгыс эвес удаа айыткан. Шак ол чүүл чоннуң сонуургалынга дүүштүр шиитпирлерни хүлээп алырынга, эрге-чагырга органнарынга турум шөлдү тургузуп турар» - деп, бүрүн эргелиг төлээ демдеглээн.
Сибирь федералдыг округ девискээринге федералдыг соңгулда кампаниязы-биле чергелештир, Тыва Республиканың баштыңын, Алтай болгаш Красноярск крайның, Омск база Томск областарның күрүне эрге-чагыргазының хоойлужудулга органнарынче депутаттар, ол ышкаш муниципалдыг соңгулдалар болур деп демдеглээн.
Медээлерден алырга, соңгулда комиссиялары күрүне эрге-чагырга черлери-биле кады белеткел ажылдарының көвей кезиин кылган. Соңгулда комиссияларынга материал-техниктиг хандырылганы планнааны ёзугаар шиитпирлээн. Оран-саваларның өртке болгаш террорге удур негелделерге дүгжүп турарынга хыналдаларны чоруткан.
Хамаатыларның соңгуур эргелерин боттандырарынга айыыл чок болгаш таарымчалыг байдалдарны тургузар дээш, эрге-чагырга органнары соңгулда комиссияларынга бүгү талалыгдеткимчени көргүзер ужурлуг дээрзин бүрүн эргелиг төлээ айыткан. «Сөөлгү чылдарда округта ведомстволар аразында кады ажылдажылганың чедиишкинниг практиказын кадагалап, деңнелди бадырбайн, улам сайзырадыр херек» - деп, бүрүн эргелиг төлээ демдеглээн.
Хурал киржикчилериниң илеткелинден алырга, Сибирь федералдыг округтуң регионнарында соңгулда кампаниялары хоойлу езугаар чоруп турар. Соңгулдаларда шынчы чижилгеге байдалдар тургустунган, соңгулда комиссияларының ажык-чарлыы хандыртынган, соңгукчуларга информация бээриниң улуг ажылдары чоруп турар, хөй-ниитиниң хайгаарал системазын организастаан. Соңгулда чорудуунуң чурумун шыңгыы сагып турарын хомудалдарның эвээжээни база улуг чурум үрээшкиннери чок болганы бадыткап турар.
Чедери берге болгаш ыраккы черлерде бадылаашкыннарны эрттиреринге белеткелче база чер чедип албас хамаатыларның соңгулда эргелерин боттандырар айтырыгларже онза кичээнгей угланган.
Ниитилел-политиктиг ажыл чорулгазында даштыкыдан холгаарлаар дээн оралдажыышкыннар үезинде, соңгулдаларның айыыл чок чоруун хандырары онза ужур-уткалыг. Хуралдың киржикчилери бо талазынче онза кичээнгейни угландырган.
Соңгулдага белеткелдиң болгаш ооң эрткениниң кол түңнели - ооң түңнелдериниң шынныында. Бо сорулганы чедип алыры-биле, Россия Федерациязының Чазааның соңгулда комиссияларынга дуза көргүзериниң дугайында доктаалында көрдүнген комплекстиг хемчеглерни үе шаанда чедимчелиг боттандырары чугула дээрзин бүрүн эргелиг төлээ демдеглээн.
Россия Федерациязының Төп соңгулда комиссиязының даргазының оралакчызы Николай Булаев, регионалдыг соңгулда комиссияларының даргалары, округ регионнарының дээди албан-дужаалдыг кижилериниң оралакчылары, Федерация округунуң субъектилеринде кол федералдыг инспекторлар, прокуратура, судтар органнарының, федералдыг ведомстволарның территориалдыг органнарының, Федерацияның субъектилеринде кижиниң эргелерин камгалаар бүрүн эргелиг төлээлер болгаш регионалдыг хөй-ниити палаталарының даргалары хуралга киришкен.