Августуң 19-та Тываның күрүне университединге, IV делегей чергелиг буддийжи форумнуң ажылының үезинде, Россияның болгаш даштыкы чурттарның өөредилге организациялары-биле кады ажылдажылга дугайында дугуржулгаларга болгаш меморандумнарга атты салыр езулал болган. Ат салган документилер өөредилге программаларын кады эгелээрин, студентилер солчулгазының программаларын калбартырын, Тываның девискээринге болгаш оон дашкаар делегей чергелиг эртем конференцияларын болгаш этнологтуг экспедицияларны эрттирерин айтып турар.Хемчегге Моолдуң, Шри-Ланканың, Непалдың, Камеруннуң, Белоруссияның, Россияның дээди өөредилге черлериниң төлээлери киришкен.
Тываның күрүне университединиң биле Моолдуң Кызылда Чиңгине консул чериниң аразында чарган керээ ол дугуржулгаларның бирээзи болган. ТывКУ-нуң ректору Ольга Хомушку база Моолдуң Кызылда чиңгине консулу Цэндсүрэн Охиндойн документиге атты салганнар.
Өөредилге, эртем, культура болгаш гуманитарлыг харылзаалар талазы-биле кады ажылдажылганы хөгжүдеринге бо дугуржулга үндезин болур деп, чиңгине консул демдеглээн.
«Бо дугуржулга өөредилге, эртем, культура болгаш гуманитарлыг кады ажылдажылга талазы-биле харылзааларывысты улам хөгжүдеринге быжыг үндезинни бээр дээрзинге бүзүрээр мен» - деп, Цэндсүрэн Охиндойн чугаалаан.
Ховд хоорайда Моолдуң күрүне университединиң Барыын регионалдыг салбыры-биле база кады ажылдажылга дугуржулгазы база чедип алдынган.
Тываның күрүне университеди база Шри-Ланкада Шри Джаяварденепура университеди-биле кады ажылдажылга дугуржулгазынга аттарны салган. Университеттиң вице-канцлери, профессор Ширанта Хинкенда ийи чурттуң аразында өөредилге харылзааларын сайзырадырының чугулазын демдеглээн.
«Россия биле Шри-Ланка үр үе дургузунда харылзаалыг ажылдап турар. Бо эгелээшкин биске дыка чугула базым болур деп санаар мен» - деп, профессор Ширанта Хинкенда демдеглээш, чалап, кады ажылдаарын сайзырадыр арганы бергени дээш, ТывКУ-га өөрүп четтиргенин илереткен.
Непалда Лумбини буддийжи университет-биле база дугуржулга чардынган. Камеруннуң Дуала университединиң уран чүүл болгаш культура институду-биле кады ажылдажылга дугайында меморандумга атты салган.
Оон аңгыда Белоруссияның күрүне университеди Тываның күрүне университединиң чаа партнерларының санынче кирген. Ийи тала ыдыктыг Мефодий биле Кирилл аттыг теология институду-биле кады ажылдажылга дугуржулгазын чарган.
Россияның буддийжи университеди база «Россияның буддистер ассамблеязы» төпчүткен шажын организациязы-биле удур-дедир кады ажылдаарының аңгы керээзинге аттар салдынган.
Регионнар аразында кады ажылдажылганы база уламчылаан. Тываның күрүне университеди, Б.Б. Городовиков аттыг Калмыкияның күрүне университеди база Доржи Банзаров аттыг Бурятияның күрүне университеди өөредилге программаларының четкизин боттандырарының дугайында үш талалыг дугуржулга керээзинге атты салганнар.
«Тываның күрүне университединиң даштыкы дээди өөредилге черлери-биле кады ажылдажылгазын тургузары – делегейниң эртем ниитилелинче кирериниң чедимчелиг аргазы-дыр» - деп, ТывКУ-нуң ректору Ольга Хомушку хемчег соонда чугаалаан.