Форум үезинде Лаостуң национал тудуг фронтузунуң төп комитединиң шажын айтырыгларының талазы-биле департаментиниң начальниги Кхамьяд Расдавонг журналистер-биле ужурашкан. Ол Лаостуң культура амыдыралынга буддизмниң ролюнуң болгаш чурттуң буддийжи өнчүзүнүң дугайында сонуургадып, форум Лаос биле Россияның кады ажылдажылгазынга чаа оруктарны ажыдар деп идегелин илереткен.
«IV делегей чергелиг буддийжи форумга киржип келгенивиске канчаар-даа аажок өөрүп тур бис. Лаос биле Россия элээн үр үе иштинде кады ажылдап турарлар. Лаоста буддизм чүс-чүс чылдарда тарап келген болгаш, чуртта кол черни ээлеп турар, ынчангаш чурттакчы чоннуң хөй кезии буддизмге чүдүп чоруур. Бо хемчег бистиң шуптувуска кады ажылдажылганың чаа аргаларын ажыдып, буддийжи байдалга кады ажылдап, тургузар ажылдарга дузалаар дээрзинге идегеп тур мен. Ол биске канчаар кады ажылдаарын, кады канчаар чурттаарын билип алырынга дузалаар болгаш үндезин өөредигни сүмелээр» - деп, Расдавонг чугаалаан.
Форум дыка солун эрткенин демдеглээш, коллегалары-биле харылзажып, кады ажылдаарынга өөрүп турарын дыңнаткан. Дипломат Лаоста тускай чүдүүр системалыг буддийжи ниитилелдер болгаш хүрээлер хөйүн, олар, бүгү талазы-биле эмнээшкинни кижилерге берип турар деп тайылбырлаан. Ооң чугаазы-биле алырга, хүрээлер дыка хөй туристерни хаара тудуп турар, а чурттуң байлак буддийжи культурлуг өнчү-салгалы чоргааралдың демдээ болур.
«Элээн каш хүрээлерлиг тускай комплекс бар. Улус ол черни "Хүрээлер чурту" деп адаар. Бүгүдеге эки чүүлдер дээш буддийжи ламалар болгаш организациялар боттарының ажыл-чорудулгазын чорудуп турар. Бо хүрээлерде аныяктарга, чонга дээш, буддийжи өөредиглерни база берип турар» - деп, Расдавонг чугаалаан.
Келир үеде буддийжи өөредилге болгаш эртем-шинчилелдер талазы-биле ажылдар калбартып, билиглерни аныяк салгалже дамчыдып, буддизм ниитизи-биле нептерээр ужурлуг деп, Лаостуң төлээзи бодалын илереткен.
«Буддийжи хүрээ бүрүзү бодунуң бүгү эртем-билии болгаш культурлуг өнчүзү-биле чуртун алдаржыдар ужурлуг» - деп, Кхамьяд Расдавонг түңнээн.
Делегей чергелиг буддийжи форум – бүгү делегейден буддийжи төлээлерни чыып, буддизмниң, буддийжи культураның, философияның болгаш практиканың сайзыралынга хамаарышкан амгы үениң айтырыгларын сайгарып, аңгы-аңгы чурттарда буддийжи организацияларның аразында делегей чергелиг кады ажылдажылганы быжыглаар хемчег-дир.
Бурятияга 2023 биле 2024 чылдарда, а Калмыкияга 2025 чылда баштайгы үш шуулган эрткен. Организаторлары Россияның Буддийжи чаңчылчаан Сангхазы, Бурят Республиканың Чазаа, Калмык Республиканың Чазаа база Роконгресстиң деткимчези-биле Буддийжи өөредилге болгаш эртем-шинчилел деткиир фонд хемчегни организастап эрттирген.